Yeni tikililərin fantastik qiymətə satılmasının səbəbi nədir? - AÇIQLAMA

Son illərdə Bakıda yeni tikililərin qiymətləri sürətlə artmaqda davam edir. 

BAKU.WS-in məlumatına görə, bəzi yaşayış komplekslərində 1 kvadrat metr üçün qiymətlər 3500–5000 manat civarına qədər yüksəlib.

Bu isə ev sahibi olmaq istəyənlər arasında ciddi müzakirələrə və narazılıqlara səbəb olub.

Bəs bu fantastik qiymət artımının arxasında hansı amillər dayanır? Tikinti bazarında nələr baş verir və mənzil almaq niyə getdikcə çətinləşir?

Mövzu ilə bağlı Azərbaycan Qiymətləndiricilər Cəmiyyətinin (AQC) sədri Vüqar Oruc BAKU.WS-ə açıqlamasında bildirib ki, yeni tikililərin qiymətinin fantastik dərəcədə yüksək olmasının bir neçə səbəbi var:

"Səbəblərindən biri daşınmaz əmlakın investisiya cazibədarlığının artması və investisiya vasitəsi kimi digər bütün vasitələri arxada qoymasıdır. İkinci səbəb tikinti xərclərinin artmasıdır. Üçüncü səbəb tikinti normativlərinin daha mürəkkəbləşməsidir. Bu da xərclərin meydana gəlməsində çox mühüm rol oynayır. Sonuncu səbəb isə tələbatdır.

Yəni bu dörd amil yeni tikililərin, hətta təməldən olan tikililərin digərlərindən baha başa gəlməsinə və bazarda daha yüksək qiymətlərlə təklif olunmasına səbəb olur".

Orxan Hüseyn