"Şirniyyatı günün birinci yarısında qəbul etmək daha doğrudur" - Qida eksperti
Şirniyyat bir çox insanlar üçün gündəlik qidalanmanın ayrılmaz hissəsinə çevrilib. Lakin mütəxəssislər xəbərdarlıq edirlər ki, şəkər tərkibli məhsulların tez-tez qəbulu həm artıq çəkiyə, həm də sağlamlıq problemlərinə səbəb ola bilər.
Qida eksperti Hüseyn Kərimov BiG.AZ-a bildirib ki, sağlam insan üçün şirniyyatın qəbulunu gündə bir dəfə ilə məhdudlaşdırmaq daha məqsədəuyğundur:
"Şirniyyatı əsas yeməklər arasında deyil, günün birinci yarısında qəbul etmək daha doğrudur. Bu zaman orqanizm şəkəri enerji kimi istifadə edir və artıq piylənmə riski azalır.
Miqdardan çox, seçilən məhsulun tərkibi önəmlidir.Rafinə olunmuş, çox yağlı kremli tortlar əvəzinə daha təbii – quru meyvə, bal və ya az miqdarda kakao ilə hazırlanmış şirniyyatlara üstünlük verilməlidir. Həftədə 3–4 dəfədən artıq şirniyyat yemək isə məsləhət görülmür.
Şirniyyata gündəlik vərdiş kimi yanaşmaq diş çürüməsi, şəkərli diabet və ürək-damar xəstəliklərinin yaranma riskini artırır. Bu səbəbdən şirniyyat qəbulunda balansı qorumaq və sağlam qidalanmaya üstünlük vermək vacibdir".
