D vitamini əlavələrinin qəbulu ürək sağlamlığına necə təsir edir?

Çinin Çjinyun Qida Laboratoriyasının alimləri ABŞ-dəki həmkarları ilə birlikdə müəyyən ediblər ki, D vitamini əlavələrinin qəbulu ürək-damar xəstəlikləri riskini, xüsusilə də orqanizmdə bu maddənin çatışmazlığı olan insanlarda əhəmiyyətli dərəcədə azaldır.

Oxu.Az bu barədə Gazeta.ru-ya istinadən xəbər verir.

Alimlər D vitamininin kardiometabolik sağlamlığa təsiri mövzusunda əvvəllər dərc edilmiş 99 tədqiqatın nəticələrini təhlil ediblər. Ümumilikdə, bu tədqiqatlarda 17 mindən çox insan iştirak edib.

Müəyyən edilib ki, gündəlik acqarına təxminən 3 320 Beynəlxalq Vahidi miqdarında D vitamini qəbulu qan təzyiqinin, xolesterin, qlükoza və insulin səviyyəsinin azalmasına kömək edir. Ən nəzərəçarpan effekt qeyri-Avropa populyasiyalarının nümayəndələrində, ilkin olaraq D vitamini səviyyəsi aşağı olan insanlarda, normal bədən kütləsi indeksi olan və 50 yaşdan yuxarı insanlarda müşahidə edilib.

Alimlər, həmçinin qeyd ediblər ki, daha uzunmüddətli müdaxilələr (üç ay və daha uzun müddətdə əlavələrin qəbulu) və müəyyən əhali qruplarında kardiometabolik sağlamlıq göstəricilərini optimallaşdırmaq üçün dozaların artırılması davamlı nəticələr verib.

Tədqiqatçılar hələ D vitamini əlavələrinin faydalı təsirinin əsasında hansı mexanizmlərin dayandığını dəqiqləşdirə bilmirlər. Onlar bunu aydınlaşdırmaq üçün əlavə tədqiqatlar aparmağı planlaşdırırlar.