Məşhur həkim koronavirusdan karantinə alındı - Analiz nəticələri gözlənilir

Koronavirusun dünyanı təsiri altında saxladığı gündən bəri çıxış etdiyi televiziya proqramlarında görülməsi vacib olan tədbirlərdən danışan Türkiyənin tanınmış sağlamlıq mütəxəssisi, dietoloq Ender Saraç karantinə alınıb.

Publika.az xəbər verir ki, dietoloqdan koronavirus analizi götürülüb. Nəticələr isə hələ bəlli deyil.

E.Saraçın yuxarı tənəffüs yollarında problem yaşandığı bildirilir. Faktı həkimin həyat yoldaşı Benan Saraç da təsdiqləyib. O, həyat yoldaşının analizi öz istəyi ilə verdiyini açıqlayıb.

Qeyd edək ki, 1959-cu ildə dünyaya gələn Ender Saraç İsveçrə, Niderland, Almaniya və Hindistanda təhsil alıb. Uzun müddət Türkiyə telekanallarında sağlamlıqla bağlı verilişlərin aparıcısı olub.