Azərbaycanda Hepatit A virusu yayılır- Necə qorunaq?

Bakı şəhəri Suraxanı rayonu Əmircan və Bülbülə qəsəbələrinin əhalisi arasında dekabr ayından başlayaraq yoluxucu Hepatit A virusu yayılıb. Bu barədə Səhiyyə Nazirliyinin Respublika Gigiyena və Epidemiologiya Mərkəzi məlumat yayıb.


Mövzu ilə bağlı BiG.AZ-a danışan həkim-infeksionist Aqil Kəməndli bildirib ki, Əmircan, Bülbülədə Hepatit A-nın su vasitəsilə yayıldığı ehtimal olunur. Azərbaycanda suda bu virusu təyin etmək metodu yoxdur.Ona görə bu virusun mənbəyini tapa bilmirlər.


Həkim qeyd edib ki, Hepatit A-dan qorunmağın ən yaxşı yolu yuyulmuş meyvə -tərəvəzdən istifadə etmək, əllərin doğru-düzgün yuyulmasını təmin etməkdir. Hepatit A çox vaxt sağalma ilə keçir. Hepatit B, C virusları kimi xronikiləşmir. Özü spontan sağalır. 0,5 faiz ehtimal var ki, fulminal hepatit dediyimiz qaraciyər yetməzliyinə getsin:


"Hepatit A virusuna 3-15 yaş aralğında olan uşaqlar daha çox yoluxur. Hepatit A ən çox yuyulmamış meyvə-tərəvəzlərdən, əllərdən mədə-bağırsaq sisteminə daxil olur, bir müddət orada qaldıqdan sonra qan və limfa yolu ilə bütün orqanizmə yayılaraq ən çox qaraciyərdə toksik təsirini göstərir. Hepatit A-dan qorunmağın ən yaxşı yolu yuyulmuş meyvə-tərəvəzdən istifadə etmək, əllərin doğru-düzgün yuyulmasını təmin etməkdir. Xəstəliyə qarşı vaksinasiya təyin olunub. Bu vaksinasiya 6 ay aralıqla 2 dəfə icra olunur. Hepatit A-ya qarşı immunoqlobulin də var. Xəstə ilə təmas zamanı və ya hər hansı xarici ölkəyə getdikdə immunoqlobulin vurulur. İmmunoqlobulin tez müddətdə vurulmağı daha yaxşıdır. Amma qoruyuculuğu azdır. Vaksinasiya olunduqda 20 il və daha artıq Hepatit A-dan qorunmaq mümkündür. Bu xəstəliyin fəsadlarını görmürük. Çox vaxt sağalma ilə keçir. Hepatit B, C virusları kimi xronikiləşmir. Özü spontan sağalır. 0,5 faiz ehtimal var ki, fulminal hepatit dediyimiz qaraciyər yetməzliyinə getsin.Bu da çox aşağı göstəricidir".