AZ
RU
EN
Süleyman Mikayılov ölkənin ən stajlı icra başçılarından biri sayılır. O, 20 ildən çoxdur Azərbaycanın müxtəlif rayonlarına rəhbərlik edir.
Süleyman Mikayılov 1962-ci ildə aprelin 27-də anadan olub. O, 1984-cü ildə Azərbaycan Dövlət Bədən Tərbiyəsi İnstitutunu bitirib. Gənclik illərində peşəkar boksla məşğul olub. Ölkə birinciliklərində uğurları var.
63 yaşlı icra başçısı təxminən 20 il gömrük orqanlarında çalışıb. Karyerasının 1 ili 2019-cu ildə ləğv edilmiş Vergilər Nazirliyi ilə bağlıdır. Bir ilə yaxın Vergilər Nazirliyinin Operativ Nəzarət İdarəsinin rəisi işləyib.
Süleyman Mikayılovun bioqrafiyasında maraqlı məqamlar az deyil. İnternet resurslarındakı məlumatlar göstərir ki, Mikayılov idmanla yanaşı həm də hüquq elminə maraq göstərib. O, 2004-cü ildə, 42 yaşında Bakı Dövlət Universitetinin hüquq fakültəsini bitirib.
Xatırladaq ki, Süleyman Mikayılov 4 mart 2010-cu ildən Qaradağ rayon icra hakimiyyətinin başçısı vəzifəsində çalışır.
Mikayılov bu təyinata kimi Yardımlı və Lənkəran rayonlarına rəhbərlik edib.
2003-cü ildən Azərbaycan Boks Federasiyasının vitse prezidentidir.
