"Vitali Balasanyan qaçıbsa, Azərbaycan bu cinayətkarı Ermənistandan tələb etməlidir" - POLİTOLOQ

Xəbər verdiyimiz kimi, Xocalı qatili Vitali Balasanyanın hazırda harada olduğu bəlli olub. Bununla yanaşı, Vitali Balasanyan 1992-ci ildə əsir götürdüyü azərbaycanlı döyüşçü Natiq Qasımovun cinayətkarı olaraqa tanınır. Natiq Qasımovun dəhşətli işgəncələr nəticəsində şəhid olduğu güman edilir. Bu günədək onun harada dəfn edildiyi məlum deyil. Vitali Balasanyan Ermənistanda olduğu təqdirdə Azərbaycana necə gətirilə bilər? Bu əliqanlı cinayətkarı hansı cəza gözləyir?
Bununla bağlı BiG.AZ-a danışan poltoloq Turab Rzayev deyib ki, Qarabağda baş verən 30 illik münaqişə dövründə Azərbaycan əhalisinə, istər hərbiçilər, istərsə də mülki əhaliyə qarşı cinayətlərə yol vermiş, kütləvi qətllər törətmiş qatillər var. Ola bilsin ki həmin şəxslər orqan ticarətində belə istifadə edilib. Eyni zamanda Azərbaycan əhalisinin əmlakına zərər vermiş yüzlərlə cani var. Bu cinayət əməllərini törədən şəxslər Azərbaycan dövləti tərəfindən müəyyən edilir:
"Vitali Balasanyan kimi cinayət əməllərini törətmiş şəxslərin həbsi həyata keçirilir. Belə şəxslər hələ də Qarabağdadırsa Azərbaycan dövləti həmin şəxsin axtarışını həyata keçirəcək. Onlar Laçın yoluna və Xocalı aeroportuna çıxan zaman həbs olunacaqlar. İkinci variantda isə gizləndikləri yerlərə əməliyyatların həyata keçirilməsi zəruridir. Amma əgər Vitali Balasanyan Ermənistana keçibsə Azərbaycan həmin şəxsi Ermənistandan tələb edə bilər. Onun birbaşa təkcə Natiq deyil, bir neçə əsgərin qətlində, onların sorğusunda iştirakı təsdiq edilib. Vitali Balasanyan Xocalı şəhərinə hücumu planlaşdıranlardan biridir. Ordakı qətliamları törədən şəxslərin başında durub".
Politoloqun sözlərinə görə, Azərbaycanda 4 minə yaxın itkin şəxs var. Bu şəxslərin nə ölüsü, nə dirisi tapılıb. Əsir kimi işlədikləri, orqanları satılması, həyatda olmaqları hələ də bəlli deyil: "Onların bir neçəsinin qalıqları tapılıb. 10 dan çox kütləvi məzarlıq aşkar edilib. Görünür bu kütləvi məzarlıqların sayı artmaqda davam edəcək. Burada məsuliyyət daşıyan bütün şəxslər aydın məsələdir ki, Azərbaycan dövləti tərəfindən həbs olunacaq. Xüsusilə Xocalı qatili Vitali Balasanyan adı hallanır. Həm Xocalı soyqırımında, həmdə Natiqin istintaqın da iştirakına görə Vitali Balasanyanın adı simvola çevrilib. Azərbaycan dövləti bu cinayətkarı tələb etməlidir. Hazırda o tapıla bilmirsə, ya Qarabağdan qaçıb, ya da gizlənib. İkinci variantda Laçın yolundan istifadə edərək qaçıb. Biz onu mütləq tutacağıq".
Turab Rzayev bildirib ki, təkcə Vitali Balasanyan yox, yüzlərlə şəxs həbs ediləcək. Azərbaycan açıq şəkildə Qarabağda erməni vətəndaşları ilə bağlı şərtini ortaya qoyub:
"Əgər kimin əli qana batmayıbsa, mülki əhaliyə terrorda iştirak etməyibsə o şəxslər Azərbaycan ərazisində qalıb, vətəndaşlığı alıb yaşaya bilərlər. Yaxud köçüb gedə bilərlər. Amma kimlərsə cinayət əməllərində iştirak edibsə biz o şəxsləri mühakimə edəcəyik. Vaxtilə Gəncəyə atılan raketin yeri qalmaqdadır. Mülki əhaliyə qarşı bu terroru törədən şəxslər həbs edilməlidir. Bu dünyada bir presedent yaradacaq ki, həm ermənilər görəcəklər müharibə törədən şəxslər cinayətə cəlb olunur. Ona görə də müharibə cinayətlərindən uzaq durmaq lazımdır. Eyni zamanda dünyada münaqişədə iştirak edən canilər cəzasız qalmayacağını, əvvəl-axır cavab verəcəklərini görəcəklər".
Sevda Səfərova