Fuad Hüseynov: "Cəbrayılda 712 mənzillik yaşayış kompleksi öz sakinlərini qəbul etməyə hazırdır"

"Cəbrayıl şəhərində 33 bina, 6 məhəllə, 712 mənzillik yaşayış kompleksi artıq öz sakinlərini qəbul etməyə hazırdır".

Bunu Oxu.Az-a açıqlamasında Qaçqınların və Məcburi Köçkünlərin İşləri Üzrə Dövlət Komitəsinin sədr müavini Fuad Hüseynov deyib.

O bildirib ki, Cəbrayıl şəhəri artıq köç prosesi reallaşan 9-cu təyinat ünvanıdır:

"Bu gün "Böyük Qayıdışa dair I Dövlət Proqramı" çərçivəsində 9-cu təyinat ünvanı olan Cəbrayıl şəhərinə köç reallaşır. İlkin mərhələdə 36 ailə, 117 nəfər öz doğma yurduna - Cəbrayıla yola salınıb. 4 Oktyabr - Cəbrayıl Şəhəri Gününü artıq sakinlər öz doğma yurdlarında qeyd edəcəklər".

Qeyd edək ki, mənzillərdən səkkizi birotaqlı, 136-sı ikiotaqlı, səkkizi iki-üç otaqdan ibarət studiya tipli, 392-si üçotaqlı, 168-i isə dördotaqlıdır.

Rövşən Əsədov