Azərbaycanda ailə başçısını itirən ailələrə uşaqpulu bərpa edilə bilər - AÇIQLAMA

"Uşaq pulu" adlanan ödəniş isə xüsusən yeni doğulan və yeniyetmə yaşına çatmayan uşaqlı ailələrə edilən yardımdır. Azərbaycanda uşaqpulunun verilməsi hələ də aktual olaraq qalır. Bəs Azərbaycanda ailə başçısını itirmiş ailələrə uşaq pulu bərpa edilə bilər?

Məsələ ilə bağlı iqtisadçı ekspert Rəşad Həsənov Sonxeber.az-a açıqlamasında bildirib ki, ümumiyyətlə uşaq pulu məsələsinə indiki halda hökumətin yanaşması ictimai tələblə uzlaşmır:

"Uşaqpulunun geri qaytarılması ən azından gələcək üçün mümkünsüz görünür. Amma nəzərə almaq lazımdır ki, ailə başçısını itirmiş və müəyyən az gəlirli həssas sosial qruplar üçün müxtəlif mexanizmlər vasitəsilə müəyyən ödənişlər edilir. Bununla yanaşı, sosial müavinətlər verilir. Bura həm ünvanlı sosial yardım mexanizmindən istifadəni, həm də ailə başçısını itirməyə görə pensiyanın təyin edilməsini nümunə göstərmək olar. O cümlədən 18-23 yaşına çatmamış və ali təhsil alan övladları olan ailələrə münasibətdə sosial müavinətin göstərilməlisini aid etmək olar".

Ekspertin sözlərinə görə, hökümət müəyyən mənada düşünür ki, bu mexanizmlər müvafiq çatışmazlığı aradan qaldırır:

"Amma təbii ki, bizim bu istiqamətdə bizim bu istiqamətdə konkret təkliflərimiz var. Bu təkliflər Azərbaycanda uşağa görə müavinətin ödənilməsi, xalq arasında uşaqpulu adlandırılan müavinət növünün ödənilməsi mexanizminin diferensial əsaslarını özündə birləşdirir. Bu o cümlədən sosial, demoqrafik və eyni zamanda insan kapitalı siyasətini dəstəkləyən bir mexanizm kimi istifadə olunmasını nəzərdə tutur. Bununla bağlı, təklif aidiyyəti üzrə çatdırılmışdır. Dəfələrlə ictimai sferada səsləndirilmişdir. Dediyimiz kimi, görünən ondan ibarətdir ki, hökumət və bu istiqamətdə dövlət siyasətini həyata keçirən orqanlar bu mexanizmin bərpa edilməsi təkliflərinə müqavimət göstərirlər. Ümid edirəm ki, Azərbaycanda yaxın gələcəkdə müvafiq təklifin istifadəyə verilməsi ilə bağlı müəyyən irəliləyişlərə nail ola biləcəyik".