"AccessBank"ın əməkdaşları tərəfindən bir neçə vətəndaşın adları onların xəbərləri olmadan 70 min dollarlıq kreditə zamin yazılıb.

Bankın fırıldaqçılığının qurbanlarından biri, jurnalist Valeh Dadaşov bildirir ki, bir neçə ay öncə məhkəmədən 70 min dollarlıq bank kreditinə "zamin dayandığı" və krediti götürən şəxsin ödəniş etməməsi səbəbilə yerdə qalan məbləğin ondan tutulacağı barədə məhkəmə qərarı alıb.

Valeh Dadaşov deyir ki, heç vaxt kiməsə zamin durmadığı halda, bu kreditin kimin olması barədə araşdırma aparan zaman ortaya bank əməkdaşlarının və vəzifəli şəxslərin cinayət məsuliyyətinə səbəb olacaq əməlləri çıxıb. Məlum olub ki, bankın vəzifəli şəxsləri sənədləri saxtalaşdıraraq, özləri üçün külli miqdarda kredit götürüblər və hazırda ödəməkdən yayınırlar. Bank isə öz əməkdaşlarının bu qanunazidd əməlləri barədə hüquq-mühafizə orqanlarına məlumat vermək əvəzinə, həmin şəxsləri işdən azad etməklə kifayətlənib. Bank sadəcə onları məhkəməyə verərək, ödənməyən kreditləri "zamin" kimi sənədləşdirdikləri şəxslərdən tutulması barədə qətnamə əldə etməyə nail olub.

Jurnalistin sözlərinə görə, araşdırma zamanı ortaya aşağıdakı məsələlər çıxıb:

"2014-cü ildə "AccessBank"ın Lənkəran şəhər filialına, həmkəndlimin tanışı, bankda kredit mütəxəssisi vəzifəsində çalışan Rauf adlı şəxsə istehlak krediti almaq üçün müraciət etdim. Bildirdilər ki, iş yerimdən arayış lazımdır. Arayışı aldıqdan sonra dedilər ki, Lənkərana gəlməyə ehtiyac yoxdur, sənədi bankın Nərimanov rayonunda yerləşən filialına təqdim etmək kifayətdir. Sənədi bankın xanım əməkdaşına təqdim etdim. Bir neçə gün sonra bankdan mənimlə əlaqə saxlayaraq bildirdilər ki, maaşım yetərli olmadığı üçün kredit verilməyəcək".

V.Dadaşovun dediyinə görə, beş ildən sonra - 2019-cu ildə ona məhkəmə qərarı gəlib ki, 70 min dollar kredit müqaviləsi üzrə ödənişlər onun maaşından tutulacaq. "Məlum oldu ki, 2015-ci ilin əvvəlində - Azərbaycanda devalvasiya baş verməmişdən bir neçə gün əvvəl "Access Bank"ın bir qrup vəzifəli şəxsi bankdan külli miqdarda pul vəsaitini mənimsəmək məqsədi ilə Rauf Rafael oğlu İbadovun adına qeyri-qanuni yollarla 70 min ABŞ dolları kredit rəsmiləşdirib. Kredit rəsmiləşdirilməsi aparılan zaman məni, 2014-cü ildə bankdan kredit almaq üçün təqdim etdiyim iş yerimdən arayış əsasında, iştirakım, razılığım və imzam olmadan zamin kimi göstəriblər.



"AccessBank"a müraciət etdiyim vaxt bankın kredit mütəxəssisi ilə həmin bankdan 70 000 ABŞ dolları götürən şəxsin adlarının eyni olması məndə müəyyən şübhələr yaratdı. Bir neçə ay apardığım araşdırmadan sonra məlum oldu ki, kredit mütəxəssisi Rauf Rafael oğlu İbadov bankın bir neçə vəzifəli şəxsi ilə əlbir olaraq külli miqdarda pul vəsaitini mənimsəyib.

Bu hadisədən sonra adı külli miqdarda pul vəsaitini mənimsəməkdə çəkilən bankın əməkdaşları və kredit mütəxəssisi işdən azad edilib. "AccessBank" keçmiş əməkdaşlarını vəzifələrindən sui-istifadə etmək yolu ilə külli miqdarda vəsaiti mənimsəklə yox, sadəcə bankın müştərisi kimi götürdükləri krediti vaxtında ödəmədikləri üçün məhkəməyə verib.

Məhkəmə isə kreditin həmin şəxs tərəfindən deyil, məhz mənim - "xəbərsiz zamin" tərəfindən ödənilməsi barədə qərar çıxarıb və əməkhaqqımın 50 faizinin tutulması barədə xəbərdarlıq edilib".

V.Dadaşov bildirir ki, məsələ ilə bağlı araşdırma aparılması, günahkar şəxslərin məsuliyyətə cəlb edilərək cəzalandırılması və ona dəymiş ziyanın ödənilməsi ilə bağlı Baş Prokuror yanında Korrupsiyaya qarşı Mübarizə İdarəsinə və digər aidiyyatı qurumlara müraciət edəcək.

"AccessBank"da baş verən bu qanunsuzluğun başqa qurbanları da var. Onlardan biri də Lənkəran rayon Sütəmurdov kənd sakini, R.Dadaşov adına Sütəmurdov kənd orta məktəbinin müəllimi Məlahət Əliyevadır. O, "AccessBank"ın əməkdaş Rauf İbadovun anası ilə birlikdə məktəbdə müəllim işləyib.

M.Əliyeva "Report"a bildirib ki, bir neçə il əvvəl Raufun anası xahiş edib ki, bankda işləyən oğlunun 3000 manat kreditinə zamin durmaq lazımdır: "Mən də onun xahişini yerinə yetirib, bankda 3000 manat kredit sənədində zamin olmaq üçün imza atdım. Raufun anası mənə dedi ki, kreditin müddəti 1 illkidir, ancaq oğlu həmin bankda işləyir və uzağı üç aya kredit tam ödəniləcək. Üç aydan sonra bildirdi ki, kredit artıq ödənilib".

M.Əliyeva əlavə edib ki, bundan bir müddət sonra həyat yoldaşı onkoloji xəstəliyə tutlduğu üçün maaş aldığı "Beynəlxalq Bank"a müraciət edərək kredit istəyib. Bu zaman ona bildiriblər ki, böyük məbləğdə kreditdə zamin olduğu üçün ona kredit ayrıla bilməz: "Həmin vaxt öyrəndim ki, məni təkcə 3000 manat kreditə yox, 70 min dollarlıq başqa bir kredit müqaviləsində də zamin kimi yazıblar. Bu barədə Raufun anasına və banka müraciət etsəm də, heç bir tədbir görülmədi. Bir müddət əvvəl isə icra şöbəsindən bildiriş daxil oldu ki, məhkəmə qərarına əsasən, həmin kredit görə mənim maaşımdan tutulacaq".

Qeyd edək ki, bankın "qurbanları" dəfələrlə "AccessBank"a müraciət etmələrinə baxmayaraq, məsələ həllini tapmayıb.