ABŞ-nin Massaçusets Texnologiya İnstitutunun (MIT) alimləri süni intellektin imkanlarını bir addım da irəli apararaq 3D modellərə təkcə görüntü deyil, toxunma hissi də qazandıran yeni sistem - "TactStyle"ı yaradıblar.

Oxu.Az xəbər verir ki, bu barədə elmi məqalə "arXiv" platformasında dərc olunub.

Yeni texnologiya 3D modellərin vizual və toxunma xüsusiyyətlərini birləşdirərək dizaynerlər, mühəndislər və təhsil sahəsində çalışanlar üçün tamamilə fərqli və interaktiv təcrübə təqdim edir.

"TactStyle" istifadəçiyə təkcə obyektin forması və rəngini deyil, həm də onun səthinin toxunma xüsusiyyətlərini - məsələn, hamarlığını, kobudluğunu və ya material hissini - bir şəkil əsasında modelləşdirməyə imkan verir. Bu sistem teksturanın mikrosəviyyəli detalları, yəni səthin "hündürlük xəritəsi"ni süni intellektin gücü ilə şəkildən avtomatik generasiya edir.

Alimlər bildirirlər ki, bu texnologiya sənaye dizaynı, təhsil, prototipləşdirmə və aksesuar istehsalı kimi sahələrdə inqilabi dəyişikliklər vəd edir.

Aparılmış psixofiziki sınaqlar da bunu təsdiqləyib. İstifadəçilər "TactStyle" ilə yaradılan teksturaları real materiallara toxunurmuş kimi hiss etdiklərini bildiriblər.

Hazırda MIT komandası bu texnologiyanı daha da təkmilləşdirərək vizual-taktil uyğunsuzluqlarla eksperimentlər aparmağı planlaşdırır. Məsələn, mərmər kimi görünən, lakin toxunduqda ağac hissi verən obyektlər yaradılacaq.

Bu yenilik 3D modelləşdirmədə yalnız görmə deyil, həm də hiss etmə dövrünün başlandığını göstərir.