Texnologiya milyarderi İlon Mask "Wikipedia"ya alternativ kimi "Grokipedia" adlı yeni onlayn ensiklopediyanı istifadəyə verib. O, platformanı "insanlıq üçün mədəniyyət baxımından mühüm addım" adlandırıb. 

BAKU.WS xəbər verir ki, yeni layihə, süni intellekt tərəfindən idarə olunan və daha çox mühafizəkar baxışlara yaxın bir informasiya mənbəyi kimi təqdim olunur. "Grokipedia"da məqalələr insan redaktorlar tərəfindən deyil, "Grok" adlı süni intellekt tərəfindən yoxlanılır. İstifadəçilər birbaşa dəyişiklik edə bilməsələr də, səhv məlumatlarla bağlı təklif göndərə bilirlər.

Hazırda platformada 885 min məqalə yer alır. Məlumatların bir hissəsi "Wikipedia"dan götürülsə də, Mask ilin sonuna qədər bu asılılığı tam aradan qaldırmağı planlaşdırır.

"Wikimedia" Fondu isə cavabında bildirib ki, "Wikipedia-nın dəyəri insan əmək və bilik birliyindən ibarətdir" və süni intellektin buna əvəz ola bilməyəcəyini vurğulayıb.

Mütəxəssislər "Grokipedia"nı Maskın süni intellekt vasitəsilə bilik istehsalı konsepsiyasının növbəti mərhələsi kimi qiymətləndirirlər.