Əsəd rejiminin devrilməsi Yaxın Şərqdə ən gəlirli narkotik şəbəkəsinin iflasına səbəb olub

Suriyada prezident Bəşər Əsəd rejiminin devrilməsi Yaxın Şərqdə ən gəlirli narkotik istehsalı şəbəkəsinin iflasına səbəb olub.

Oxu.Az-ın xəbərinə görə, bu barədə ABŞ-nin "The Wall Street Journal" (WSJ) nəşri məlumat verib.

Məlumata görə, Suriyada istehsal olunan kaptaqon - metamfetaminə bənzər narkotik maddə Əsəd rejiminə böyük sərvət toplamağa və onun ölkəsinə qarşı tətbiq edilən sanksiyaların nəticələrini kompensasiya etməyə kömək edib. Lakin bu, həm də Suriya ilə qonşuları arasında beynəlxalq gərginlik mənbəyinə çevrilib.

Jurnalistlərin yazdıqlarına görə, rəsmi Dəməşqin təkziblərinə baxmayaraq, kiçik laboratoriyalarda narkotiklərin istehsal edilməsi Suriyada hamıya məlum olub, lakin müxalifətin bu yaxınlarda aşkar etdiyi obyektlərin böyüklüyü rejimin bütün səviyyələrində ticarətin heyrətləndirici miqyasını nümayiş etdirir.

Vaşinqtonda yerləşən "New Lines Institute" (NLI) analitik mərkəzinin kaptaqon ticarəti üzrə eksperti Kerolayn Rouz qeyd edib ki, bu, narkotik istehsalı Əsəd rejiminin sistematik şəkildə kaptaqon istehsalı və ticarətinə cəlb olunduğunu, oraya böyük məbləğdə vəsaitin yatırıldığını sübut edir.

NLI kaptaqon üzrə illik ticarət həcmini təxminən 10 milyard dollar dəyərində qiymətləndirir ki, bu da Avropadakı kokain bazarının dövriyyəsi ilə, demək olar ki, eynidir.