"Balqabaq, ilk növbədə zəngin antioksidant, vitamin və mineral tərkibinə görə beyin sağlamlığına güclü təsir göstərən qida maddələrinin unikal birləşməsidir".

Oxu.Az mk.ru-ya istinadən xəbər verir ki, bunu amerikalı nevroloq və qidalanma mütəxəssisi Timoti Fri bildirib.

Onun sözlərinə görə, balqabağın tərkibində olan A və C vitaminləri kimi antioksidantlar hüceyrələrimizi zədələrdən qoruya bilər.

Dietoloq Culia Zumpano qeyd edib ki, balqabaq qanda şəkəri tənzimləməyə kömək edən, toxluq yaradan, bağırsaq sağlamlığını təmin edən və həzmi təşviq edən liflə zəngindir.

"Balqabaq, həmçinin pis xolesterolu azaltmağa kömək edə bilər və çox aşağı kalorilidir. Tərkibində A vitamininə çevrilən beta-karotin var ki, bu da orqanizm tərəfindən dəri və immunitet sağlamlığını yaxşılaşdırmaq üçün istifadə edilə bilər. Biz, həmçinin bilirik ki, kalium qan təzyiqini aşağı salmağa yardımçı olur", - deyə o vurğulayıb.

"Balqabaq tumları tərkibindəki yüksək maqnezium, sink, dəmir və triptofan sayəsində xüsusilə sağlamlıq mənbəyidir. Tumlardakı amin turşusu olan triptofan əhvali-ruhiyyəni, yuxunu və iştahanı tənzimləyən serotoninin analoqu hesab olunur. Balqabaq toxumu əhvali-ruhiyyəni yaxşılaşdırmağa, depressiya əlamətlərini azaltmağa və yuxu keyfiyyətini yaxşılaşdırmağa kömək edə bilər", - T.Fri əlavə edib.