Soçidə keçirilən sammitlə bağl parlament qarşısında çıxış edən Ermənistanın baş naziri Nikol Paşinyan növbəti dəfə Rusiyanı itiiham edib.
Rəsmi Moskvanı İrəvanın təklif etdiyi bəndləri qulaqardına vurmamaqda günahlandırıb. Baş nazir bəyan edib ki, Ermənistan tərəfi Rusiyanın Qarabağdakı sülhməramlılarının mandatının uzadılması ilə bağlı qərarın qəbul edilməsi təklifi ilə çıxış edib, lakin bu, rədd edilib. "Biz mandatın qeyri-müəyyən müddətə - 5-20 il müddətinə uzadılmasını təklif etdik. Qəbul olunmasa da, mənim fikrimcə, məsələ artıq aktuallaşıb və gündəliyə salınacaq", - Paşinyan bildirib.

Nikol Paşinyan bununla da Soçi sammitinin Ermənistan üçün məğlubiyyət olduğunu bəyan edən erməni siyasilərinin də fikirlərini təsdiqləmiş olub. Qeyd edək ki, erməni siyasilər və politoloqlar mediaya açıqlamalarında birmənalı şəkildə bildirirər ki, sülhməramlıların müddətinin uzadılması ilə bağlı bəyanatda aydınlıq yoxdur, sadəcə eyham var. Və narahatlıqları da odur ki, bəyanatda Qarabağdan bəhs edilmir. Onların bu qənaətinin formalaşmasında Rusiya prezidentinin də fikirləri mühüm rol oynayıb. Xatırladaq ki, V.Putin bəyan edib ki, koordinasiya mərhələsində tərəflərin etirazları səbəbindən bəyanatdan bir sıra bəndlər çıxarılıb.

Azər Nuriyev