"Lexus GX" modeli, tamamilə yenilənmiş üçüncü nəsil versiyası ilə premium sinif avtomobil bazarında öz zirvəsini möhkəmləndirir. 11 illik gözləntidən sonra təqdim edilən bu yeni GX bir sıra möhtəşəm yeniliklər və texnoloji üstünlüklər təqdim edir.

Azərbaycanda təqdim edilən "Lexus GX", 3.5 litrlik, 6 silindrli "twin-turbo" benzin mühərrik ilə təchiz olunacaq. Bu mühərrik 354 at gücünə və 10 pilləli avtomatik sürətlər qutusuna sahibdir. Bundan əlavə, GX öz sinfində ən yüksək dartma gücünü - 3.5 ton yedəkləmə qabiliyyətini təmin edir.

Eksteryer Dizaynı

Yeni "Lexus GX", "Lexus"un qlobal GA-F platforması üzərində qurulub. Bu platforma sayəsində avtomobil köhnə nəsillə müqayisədə 20% daha möhkəm kuzova malikdir və ən aşağı NVH (səs və vibrasiya) göstəriciləri ilə fərqlənir.

Yeni GX-in eksteryeri üfüqi dizayn motivinə əsaslanır. Radiator barmaqlığı avtomobilin ümumi dizaynına uyğun şəkildə hazırlanıb. Bamper kənarlarının yuxarı qaldırılması, yolsuzluq şəraitində zədələnmənin qarşısını almaq üçündür. Kapot hissəsinin alçaq olması sürücülərə daha geniş görüntü bucağı təmin edir. Avtomobil üç proyeksiyalı LED ön fənərlərə malikdir ki, bu da çətin şəraitlərdə zədələrdən qorunma məqsədi daşıyır. GX, həmçinin "Blade Scan" texnologiyası ilə təchiz olunub.

Yeni GX-in ölçüləri əvvəlki nəsillə müqayisədə daha böyükdür: ümumi uzunluq 70 mm, hündürlük 35 mm, təkər bazası isə 60 mm artıb. Yan tərəfdə axıcı, üfüqi xətlər avtomobilin güclü və stabil görünüşünü təmin edir. Elektriklə idarə olunan ayaqaltılar avtomobil 5 km/s sürətə çatdıqda avtomatik olaraq qatlanır və qapılar açılarkən yenidən açılır. GX-in təkərləri 20 və 22 düymlük müxtəlif ölçülərdə təklif olunur.

Avtomobilin arxa hissəsində yüksək yerləşdirilmiş LED işıqlandırmalar var ki, bunlar dumanlı hava şəraitində mükəmməl aydınlıq təmin edir. Baqaj qapısı ağıllı texnologiya ilə təchiz edilib və aşağı tavanlı qarajlarda qapının açılma dərəcəsi avtomatik olaraq tənzimlənə bilir.

İnteryer Dizaynı

"Lexus GX"in interyeri insan mərkəzli dizayn yanaşmasına əsaslanır. Dizaynerlər, qaranlıq meşənin ortasında yerləşən müasir və rəqəmsal bir evdən ilhamlanaraq, GX-in iç məkanını yaradıblar. İnteryerin yaradılmasında rahatlıq və müasirlik əsas götürülüb.

Bu modeldə "Lexus"un eksklüziv "Tazuna" kokpiti istifadə olunub. Bütün düymələr və multimedia ekranları sürücüyönümlü bucaq altında dizayn edilib. Bununla da əsas məqsəd sürücünün diqqətini daim yolda saxlamaqdır.

GX-in əsas diqqət çəkən interyer xüsusiyyətlərindən biri 14 düymlük sensor ekran və 12.3 düymlük rəqəmsal kombimetrdir. Həmçinin, 10 düymlük yüksək dəqiqlikli proyeksiya ekranı (HUD) da mövcuddur. Öndə və arxada USB-C girişləri ilə təchiz edilmiş avtomobil, arxa sərnişinlər üçün yüksək gücdə (15W) şarj imkanı təmin edir.

"Lexus GX"in lüks modellərində "Mark Levinson" səs sistemi mövcuddur ki, bu da 21 dinamik ilə mükəmməl səs keyfiyyəti təqdim edir. Oturacaqlar 10 fərqli hissəyə tənzimlənir və perforasiyalı dizaynı avtomobilin ön radiator barmaqlığına uyğun şəkildə hazırlanıb.

Yolsuzluq Texnologiyaları

"Lexus GX", çətin yolsuzluq şəraitində üstün performans üçün "Overtrail" komplektasiyası ilə təchiz olunub. Bu paketdə ön bamperin altında əlavə qoruyucu, daha yüksək klirens, qara dam relsləri və daha geniş təkərlər mövcuddur. "Overtrail" xüsusi yolsuzluq rejimlərinə malikdir və 18 düymlük "TOYO" təkərləri ilə təchiz olunub.

GX-in yolsuzluq rejimlərindən biri də "Multi-Terrain Select" (MTS) sistemidir. Bu sistem vasitəsilə sürücü 6 fərqli rejim arasında seçim edə bilir: Palçıq, qum, daş, qar və s. Bu sistem sayəsində avtomobilin əyləc, mühərrik və asqı sistemi yol şəraitinə uyğunlaşır.

Təhlükəsizlik və Texnoloji İnnovasiyalar

"Lexus GX"in təkmilləşdirilmiş təhlükəsizlik sistemləri, avtomobili hər hansı qəzadan qorumaq üçün genişlənmiş "Pre-Collision System" (PCS) və dinamik radar kruiz-kontrol sistemləri ilə təchiz olunub. Avtomatik yüksək şüa idarəetmə sistemi (AHB) isə sürücülərə daha rahat və təhlükəsiz gecə sürüş təcrübəsi təqdim edir.

Bu yeni "Lexus GX" modeli, həm rahatlıq, həm də yolsuzluq qabiliyyəti baxımından premium sinfin yeni zirvəsidir.