Türkiyənin Muğla vilayətinin Fethiye rayonunun dünyaca məşhur turizm məhəlləsi olan Göcekin buxtalarında dəniz tısbağalarının məskunlaşdığı əraziləri qorumaq məqsədilə yay mövsümündə müəyyən saatlarda musiqinin ucadan səsləndirilməsinə qadağa qoyulub.

Oxu.Az xəbər verir ki, bu barədə DHA agentliyi məlumat yayıb.

Bildirilir ki, cari ilin 15 may-15 sentyabr tarixləri arasında yerli vaxtla axşam saat 20:00-dan (Bakı vaxtı ilə 21:00) səhər saat 08:00-a (Bakı vaxtı ilə 09:00) qədər qayıqlarda musiqi səsləndirilməyəcək.

Qadağanın məqsədi dəniz tısbağalarının populyasiyasını qorumaqdır. Qadağaya əməl etməyən qayıq sahiblərinə qarşı inzibati tədbirlər görülə bilər.

Qayıqlarda musiqinin ucadan səsləndirilməsi yalnız Türkiyə Ətraf Mühit, Şəhərsalma və İqlim Dəyişiklikləri Nazirliyinin xüsusi icazəsi ilə mümkün olacaq.