Koreya Respublikası Prokurorluğu dekabrın 3-də hərbi vəziyyətin tətbiqinə rəhbərlik etmək üçün təyin olunmuş ordu qərargah rəisi Park An Sunu qiyamda iştirak şübhəsi ilə həbs edib.

Oxu.Az-ın xəbərinə görə, bu barədə "News1" agentliyi məlumat verib.

Məlumata görə, hüquq-mühafizə orqanları Park An Sunun əməllərini əsas icraçı kimi təsnif edir. Koreya Respublikasının Cinayət Məcəlləsi üsyanın iştirakçılarını əlaltıların lideri, əsas icraçılar və qiyamın adi iştirakçılarına bölür. İlk iki kateqoriya üzrə ömürlük həbs və ya ölüm cəzası verilə bilər.

Daha əvvəl isə Park An Su iddia edirdi ki, prezidentin müraciətinə qədər hərbi vəziyyətin tətbiqi planlarından xəbərsiz olub. Park An Su hərbi vəziyyətin tətbiqi və təminatına rəhbərlik etmək üçün təyin edilib və onun adı bu hüquqi rejimlə əlaqəli olan tədbirlərə dair sərəncamların altında keçir.

Xatırladaq ki, bundan əvvəl keçmiş müdafiə naziri Kim Yon Hyun, hərbi əks-kəşfiyyat komandanlığının rəhbəri Yo İn Hyun, hərbi kəşfiyyat komandanlığının rəhbəri Mun San Ho, paytaxtın müdafiə komandanlığının rəhbəri Li Çjin Yu, ordunun xüsusi təyinatlılarının komandanı Kvak Çon Qın, həmçinin keçmiş hərbi kəşfiyyat rəisi No San Von, Cənubi Koreya polisinin baş komissarı Ço Çji Ho, paytaxt polislərinin rəisi Kim Bon Sik həbs edilib.

Cənubi Koreya polisinin baş komissarı Ço Çji Ho dindirilmə zamanı bildirib ki, Prezident Yun Sok Yol ona altı dəfə zəng edib və dekabrın 3-4-də hərbi vəziyyət dövründə deputatların həbs olunmasını tələb edib. Ordunun xüsusi təyinatlı qüvvələrinin komandanı Kvak Çon Qının sözlərinə görə, Yun Sok Yol dekabrın 4-də hərbi vəziyyətin ləğvi ilə bağlı səsverməni pozmaq üçün Milli Assambleya deputatlarının parlament binasından çıxarılmasına göstəriş verib. Cənubi Koreya prokurorluğu prezidenti üsyanın təşkil edilməsində şübhəli bilinən əlaltıların lideri hesab edir.