"Asteriks və Obeliks Sezara qarşı" komediya filmində Kakofoniks roluna görə daha çox məşhurlaşan fransalı aktyor, rejissor və dramaturq Pyer Palmad narkotikin təsiri altında qəza törətdiyinə görə beş il azadlıqdan məhrum edilib.

Oxu.Az-ın verdiyi məlumata görə, bu barədə BFMTV kanalı xəbər yayıb.

Bildirilib ki, qəza 2023-cü ildə baş verib. Hadisə nəticəsində üç nəfər ciddi xəsarət alıb. Zərərçəkənlərdən biri hamilə olub və uşağını itirib.

Aktyor məhkəmə iclasından əvvəl zərərçəkənlərdən üzr istəyib. O, artıq spirtli içki və narkotik maddələr qəbul etmədiyini bildirib.

"Bir fikir, bir söz: bu zərərçəkənlərə aiddir. Onların mümkün qədər tez sağalmasını bütün qəlbimlə arzulayıram. Bu gün mən onları real həyatda gördüm və bu məni sarsıtdı", - deyə Palmad söyləyib.

Aktyora təyin edilə biləcək maksimum cəza 14 il həbs idi.

Qeyd edək ki, bu aktyorun ilk həbsi deyil. 2019-cu ildə narkotik istifadəsinə görə həbs olunduqdan sonra verdiyi müsahibədə o, açıq şəkildə narkotik asılılığından əziyyət çəkdiyini etiraf edərək demişdi: "Kokain 20 yaşımdan həyatımı məhv etdi".