Yollarda "ŞOU" göstərən toy karvanları ləğv edilə bilərmi? - Açıqlama

Bəhrəmtəpə-Biləsuvar avtomobil yolunda 4 nəfərin ölümü ilə nəticələnən yol-nəqliyyat hadisəsi baş verib. Qeyd edək ki, qəzaya uğrayan avtomobillərdən biri toy karvanına daxil imiş.

Bakıda toy mövsümünün başlaması ilə avtomobil yollarında hərəkətin iflic vəziyyətə düşməsi artıq narahatçılıq yaradan məqamlardandır. Bundan başqa toy karvanlarının yollarda göstərdiyi "şou"-lar insanların ölümünə səbəb olub.

Bəs bu toy karvanlarının ləğvi haqqında fikirlər necədir?

Mövzu ilə bağlı BiG.AZ-a danışan sosioloq Elçin Bayramlı bildirib ki, bu problem demək olar ki, təkcə Azərbaycanda mövcuddur.

"Çünki, dünya ölkələrinin heç birində bu cür hallara rast gəlinmir. Toy karvanın olması bizim qədim adət-ənənəmizdir. Burda problem toy karvanında deyil. Problem psixoloji problemləri olan insanların özündə və onların törətdiyi hərəkətlərdədir.

Gəlini evindən çıxarıb aparılması mütləq maşın karvanının müşaəti ilə olmalıdır. Əlavə səs-küy salmadan və yol hərəkət qaydalarına riayət etmək şərti ilə.
Digər hallarda mütləq bu "şou" göstərən karvanlar saxlanılmalıdır. Təqsirkarlar cəzalandırılıb, protokol tərtib edilməlidir, ağır cərimələr verilməlidir.
Toy karvanlarında bəzən sürücülük vəsiqəsi olmayan yeniyetmələrə valideyinlər avtomobillərin idarəsini tapşırırlar. Bunun nəticəsində isə ağır avtomobil qəzaları törədilir. Belə valideyinlər həbs olunmalı, maşınları isə müsadirə edilməlidir.

Bu gün Azərbaycanda demək olar ki, ictimai mühiti səs-küylə pozanlar cəzasız qalır. Buna görə də toy maşının müşaəti zamanı kim ürəyi necə istiyirsə elə davranır və biyabırçılıqlar törədir. Əgər ağır cəza və cərimələr olsa bu hallar mütləq aradan qalxacaqdır. Bütün nümunəvi ölkələrdə bu cür problem yalnız cəzalandırma yolu ilə öz həllini tapıb".