MİQ üzrə müsabiqənin test imtahanı mərhələsi başlayıb
![MİQ üzrə müsabiqənin test imtahanı mərhələsi başlayıb](https://images.oxu.az/2024/07/02/yIG2a8NBIbB00cknLqKUaFxQDLxMRkMX7FgYWPrT:1200.jpg)
İyulun 2-dən müəllimlərin işə qəbulu (MİQ) üzrə müsabiqənin test imtahanı mərhələsinə start verilib.
Oxu.Az xəbər verir ki, bu barədə Elm və Təhsil Nazirliyi məlumat yayıb.
Bildirilib ki, test imtahanları iyulun 2-dən 10-dək ölkə üzrə 39 imtahan mərkəzini əhatə edəcək.
İmtahanların ilk gününə texnologiya fənni üzrə 2 564, təsviri incəsənət fənni üzrə 1 592 namizəd dəvət olunub.
Test imtahanında hər namizədə ixtisası üzrə ümumi təhsil müəssisələrinin fənn proqramlarına aid 40 sual, tədris metodikası və təlim strategiyalarına aid 20 sual təqdim edilir. Bu mərhələdə ixtisas üzrə düzgün cavablandırılan test tapşırıqları 2 bal, tədris metodikası və təlim strategiyaları üzrə isə 1 bal olaraq hesablanacaq. Ümumilikdə 100 ballıq qiymətləndirmə sistemi tətbiq ediləcək.