"Xocalı soyqırımının ildönümü ərəfəsində aşkar olunan kütləvi məzarlıq sanki ilahi ədalətin bir təcəssümüdür"-DEPUTAT

"Azərbaycan tarixinin ən dəhşətli səhifələrindən biri olan Xocalı soyqırımından 32 il ötür. Bu il Xocalı qurbanlarının əziz xatirəsini ərazi bütövlüyümüzün və suverenliyimizin tam təmin olunduğu şəraitdə yad edirik. Ötən ilin sentyabrın 19-da sadəcə 23 saat davam edən lokal antiterror əməliyyatı nəticəsində ərazi bütövlüyümüz və suverenliyimiz tam təmin olundu. Azərbaycan Vətən müharibəsində qazandığı qələbə və daha sonra həyata keçirdiyi lokal antiterror tədbirləri nəticəsində təkbaşına beynəlxalq hüququ və ədaləti bərpa edib. 1992-ci il fevralın 25-dən 26-na keçən gecə erməni hərbi birləşmələri Rusiyanın 366-cı motoatıcı alayının köməyi ilə Xocalı şəhərinə hücum edib. Şəhərin 2 500 sakini xilas olmaq üçün Ağdam istiqamətində hərəkət edib. Ermənilər isə dinc sakinləri gülləbaran ediblər".

Bu sözləri BiG.AZ-a deputat Tamam Cəfərova deyib.

O bildirib ki, Erməni təcavüzkarlarının Azərbaycan xalqına qarşı törətdiyi növbəti kütləvi qırğın 613 nəfərin, o cümlədən 106 qadın, 63 uşaq, 70 qocanın həyatına son qoyub. 1 275 dinc sakin əsir götürülüb, onlardan 150 nəfərin taleyi hələ də məlum deyil. 475 nəfər şikəst olub. 8 ailə bütünlüklə məhv edilib. 25 uşaq hər iki valideynini, 130 uşaq isə valideynlərindən birini itirib.

"1994-cü ildə Heydər Əliyevin təşəbbüsü ilə Milli Məclis "26 fevral - Xocalı soyqırımı günü haqqında" xüsusi qərar qəbul edib. Sənəddə hadisənin başvermə səbəbləri və günahkarları təfsilatı ilə açıqlanıb.Xocalınının qısası alınıb. Böyük qürur və fəxarətlə bu il Xocalı soyqırımı qurbanlarını düşməndən, separatizmdən azad olan Xocalıda da yad edəcəyik. Artıq, Xocalı soyqırımı qurbanlarının və bütün şəhidlərimizin ruhu şaddır. Xocalı soyqırımının ildönümü ərəfəsində aşkar olunan kütləvi məzarlıq da sanki ilahi ədalətin bir təcəssümüdür.

XX əsrin faciəsi olan #Xocalı soyqırımı işğalçı və cinayətkar erməni siyasətinin nəticəsidir. XX əsrin sonunda baş vermiş bu faciə təkcə Azərbaycan xalqına deyil, bütün insanlığa, bəşəriyyətə qarşı yönəlmiş ən ağır cinayətlərdən biridir. Xocalı soyqırımı qurbanları başda olmaqla, bütün şəhidlərimizi hörmət, minnət və şükranlıqla anırıq. Allah rəhmət eləsin! Ruhları şad olsun!"

AYSEL ƏKBƏR