Xəbər verdiyimiz kimi, tanınmış idmançı Kamil Zeynallı Rusiyada saxlanılıb. Kamil Zeynallı Ermənistan tərəfindən beynəlxalq axtarışa verildiyini və onların tələbi ilə saxlanıldığını bildirib. İdmançı Rusiya tərəfindən Ermənistana təhvil veriləcəyini deyib. Bəs Kamil Zeynallı Ermənistana ekstradisiya oluna bilərmi?


BiG.AZ xəbər verir ki, mövzu ilə bağlı hüquqşünas Cavid Rəhimli açıqlama verib.


O bildirib ki, Kamilin ekstradisiya olunması üçün Ermənistanın ittiham etdiyi əməl Rusiya qanunvericiliyinə görə də cinayət hesab edilməlidir. (İkiqat cinayətkarlıq prinsipi). Həmin əməl Ermənistan və Rusiya arasında ekstradisiya üçün müəyyən edilmiş cinayət əməlləri arasında olmalıdır.


"Müvafiq hüquqi əsas olması ekstradisiyanı şərtləndirmir. Sadəcə ekstradisiya üçün əsas yaradır, sonda verilən qərar isə siyasi olur. Hansı əməllə ittiham olunduğunu bilmirəm, məsələn Ermənistan vətəndaşının xüsusi mülkiyyətinə zərər vurması ilə ittiham olunursa və müvafiq əməl müvafiq siyahıda varsa, hüquqi əsas yarana bilər. Ancaq ittiham olunduğu əməl siyasi məsələdirsə, onda hüquqi əsas yaranmır.Həmçinin Rusiyanın beynəlxalq insan hüquqları öhdəlikləri ekstradisiya nəticəsində təqsirləndirilən şəxsin fundamental hüquqlarının pozulacağı (ədalətsiz məhkəmə, işgəncə və s.) təqdirdə bunun qarşısını alır.Yəni hüquqi əsas mövcud olsa belə, Azərbaycan - Rusiya diplomatik əlaqələrini və digər siyasi məqamları nəzərə alanda ekstradisiyanın baş tutmayacağını deyə bilərik. Əgər ittiham olunan əməl Rusiya və Azərbaycan qanunvericiliklərinə görə də cinayətdirsə, onda Rusiyada mühakimə edilə və ya Azərbaycana ekstradisiya edilə bilər. Əgər May ayından beynəlxalq axtarışda idisə, Azərbaycanı tərk edə bilməzdi, nəsə qaranlıq məqamlar var".
AYSEL ƏKBƏR