Messi yenə "Qızıl buts" qazandı

MLS-in (ABŞ Peşəkar Futbol Liqası) pley-off mərhələsinin 1/8 finalı ərəfəsində "İnter Mayami"nin ulduz futbolçusu Lionel Messi mövsümün ən məhsuldar oyunçusu kimi "Qızıl buts" mükafatına layiq görülüb. 

BAKU.WS xəbər verir ki, məlumatı "Çempionat" nəşri yayıb.

38 yaşlı argentinalı hücumçu müntəzəm mövsümdə 28 oyunda 29 qol vuraraq rəqiblərini geridə qoyub. Onun ən yaxın izləyiciləri "Los-Anceles" klubunun futbolçusu Deni Buanqa və "Neşvill"in hücumçusu Sem Sarric olub – hər iki oyunçu mövsümü 24 qolla başa vurub.

Messi 2023-cü ilin yayında "İnter Mayami"yə transfer olunub. O vaxtdan bəri bütün turnirlərdə 82 matçda meydana çıxaraq 71 qol və 37 asistlə yadda qalıb. "Transfermarkt"ın məlumatına əsasən, təcrübəli futbolçunun bazar dəyəri hazırda 18 milyon avro təşkil edir.