"Müasir əmək bazarında işə qəbul prosesində ilk təəssüratı formalaşdıran əsas amillərdən biri namizədin CV-sidir. Mükəmməl CV sadəcə məlumatların toplusu deyil, həm də namizədin peşəkar imicinin vizit kartıdır".

Bu sözləri insan resursları üzrə mütəxəssis Fatimə Abbasova BiG.AZ-a bildirib.

O qeyd edib ki, CV maksimum 1-2 səhifəlik olmalı, ən vacib məlumatlar ön hissədə qeyd edilməlidir. İşəgötürən uzun mətni oxumaq əvəzinə əsas məqamları qısa və dəqiq görmək istəyir:

"CV-də təcrübə və bacarıqların vəzifəyə uyğunlaşdırılması mühüm rol oynayır. Hər iş üçün eyni CV-ni göndərmək düzgün yanaşma deyil. Namizəd müraciət etdiyi vakansiyanın tələblərinə uyğun olaraq, təcrübəsini və bacarıqlarını xüsusi vurğulamalıdır.

Dil bilikləri, texniki bacarıqlar və şəxsi keyfiyyətlər CV-də mütləq qeyd olunmalıdır. Amma şəxsi məlumatların (ailə vəziyyəti, maraqlar və s.) çox yer tutması məqsədəuyğun sayılmır.
Dizayn sadə və oxunaqlı olmalı, ortaq şriftlərdən istifadə edilməlidir.CV bəzəkli qrafik elementlərlə yüklənməməlidir. Peşəkarlıq, sadəlik və dəqiqlik hər zaman daha çox qiymətləndirilir. Mükəmməl CV qısa, strukturlaşdırılmış, vakansiyaya uyğunlaşdırılmış və vizual baxımdan sadə olmalıdır".