Bakı şəhərində taksi fəaliyyəti ilə məğul olanlar üçün yeni qadağa qüvvəyə minib. Oktyabrın 9-dan etibarən bəzi avtomobillərin Bakı şəhərində taksi kimi istifadəsinə qadağa qoyulub. Söhbət 2009-2010-cu illər istehsalı olan avtomobillərdən gedir. Azərbaycan Yerüstü Nəqliyyat Agentliyi (AYNA) bu məlumatı təsdiqləyib.

Mövzu ilə bağlı BiG.AZ-a danışan nəqliyyat üzrə ekspert Elməddin Muradlı bildirib ki, bunlar taksi qiymətlərinə çoxdan təsir göstərib. İlin axırı daha bir qrup bloklanacaq:

"Yeni avtomobillər ucuz qiymətə taksi xidməti göstərmək istəmir. Bu da anlaşılandır. İndiki dövrdə o sürücülərin bahalı maşınla ucuz qiymətə xidmət göstərmək borcu yoxdur. Maşını ona görə təzələyirlər ki, pul qazansınlar. Bu, təbii prosesdir. Bloklanma ardıcıl gedir. İlin axırı daha bir qrup bloklanacaq. Maşınların 15 ili tamam olursa, sistem onu avtomatik bloklayır. Bu, normaldır. Çünki əvvəldən belə olacağı deyilmişdi".