AZ
RU
EN
Türkiyənin yeni SOM raket kompleksinin ilk dəfə Azərbaycan ordusunun silahlanmasına daxil olması onu deməyə əsas verir ki, Ankara bütün müasir hərbi texnikaları məhz Bakıya idxal edəcək.
MAY.AZ xəbər verir ki, bu fikirləri oxu.az-a açıqlamasında azərbaycanlı hərbi ekspert Üzeyir Cəfərov Türkiyədə “Hurjet” təlim təyyarəsinin maketinin nümayişini şərh edərkən deyib.
Onun sözlərinə görə, bu, beşinci nəsil qırıcı təyyarələrdə uçuş təhsili üçün müasir təlim təyyarəsidir:
“Manevr qabiliyyəti, elektro-optik sistemi, hədəfin məhvedilmə məsafəsi yaxşılaşdırılıb. Təyyarə pilotu günün istənilən vaxtı raket hücumu barədə xəbərdar edən, zenit topların yerini müəyyən edən naviqasiya sistemi ilə təchiz edilib”.
Ekspert qeyd edib ki, belə yüksək nailiyyətə görə türk həmkarları təbrik etmək olar.
“Bu il Azərbaycan və Türkiyənin birgə hərbi təlimləri planlaşdırılır. Bütün bunlar ondan xəbər verir ki, türk tərəfi Azərbaycan ordusunun modernləşdirilməsi üçün böyük plana sahibdir. İstisna deyil ki, “Hurjet” təyyarələrinin ilk partiyası da Bakıya göndəriləcək”, - müsahibimiz qeyd edib.
Xatırladaq ki, Türkiyə ilk dəfə “Hurjet” reaktiv təlim təyyarəsinin maketini təqdim edib.
Qırıcının təqdimatı 2018-ci il iyulun 16-da Beynəlxalq aviaşouda baş tutub.
“Hurjet” 5-ci nəsil təlim təyyarələrinin yaradılması məqsədilə hazırlanıb.
“Hurjet”in uzunluğu 13,4 metr, qanadlarının ölçüsü 11 metrdir. Qırıcı 3 000 kiloqram yüklə 45 min fut hündürlüyə qalxa və maksimum saatda 1 500 kilometr məsafə qət edə bilər.
Təyyarələrin hazırlanması 2022-ci ildə başa çatmalıdır.
