Bakıda kafedə bədbəxt hadisə baş verib.

May.Az Musavat.com-a istinadən xəbər verir ki, hadisə paytaxtın Səbail rayonu ərazisində, "20-ci sahə” yaşayış massivində yerləşən "Orxan” kafesində baş verib.

Kafenin musiqi qrupunun sintezator ifaçısı, 51 yaşlı Aydın adlı şəxs (soyadını dəqiqləşdirmək mümkün olmayıb) iş yerində dünyasını dəyişib. Musiqiçi həmkarları ilə birlikdə musiqi səsləndirirmiş. Həmin vaxt kafedə müştərilər olub. Qəfildən o, huşunu itirib və başı musiqi alətinin üstünə düşüb. İşçilər və müştərilər onun yardımına tələssələr də, həyata qaytarmaq mümkün olmayıb.

Hadisə barədə hüquq-mühafizə orqanlarına və təcili tibbi yardım xidmətinə məlumat verilib. Həkim briqadası 51 yaşlı kişinin infarktdan dünyasını dəyişdiyini müəyyən ediblər. Meyit müayinə olunması üçün məhkəmə-tibbi ekspertizasına aparılıb.