Növbəti ildən etibarən evlərini sığorta etdirməyən şəxslər hər 20 gündən bir cərimə ediləcəklər.

Xezerxeber.az-ın məlumatına görə, 2020-ci il yanvar ayının 1-dən etibarən əmlakın icbari sığortalanmasına nəzarət daha da gücləndiriləcək.

Sığorta məsələləri üzrə ekspert Tural Şükürov deyib ki, mülkiyyətində və faktiki sahibliyində daşınmaz əmlak olan bütün vətəndaşlar, sahibkarlar və hüquqi şəxslər sığorta müqaviləsini məcburi qaydada baglamalıdır.

Ekspert cərimələrin kim tərəfindən edilməsi məsələsinə də aydınlıq gətirib. Bildirib ki, fiziki şəxslər yerli icra orqanları, hüquqi şəxslər isə Fövqəladə Hallar Nazirliyi tərəfindən cərimə ediləcək. Yaxın gələcəkdə gözlənilir ki, əmlak bazası İcbari Sığorta Bürosuna inteqrasiya edilsin. Bu zaman sığorta cərimələri avtomatik qaydada həyata keçiriləcək.

Ekspert deyib ki, əmlakı sığorta etdirmək üçün hansısa sığorta şirkətinə getmək şərt deyil. İstənilən sığorta şirkəti ilə əlaqə saxlayıb onları ünvana dəvət etmək kifayətdir.

Yalnız qəzalı, tikintisi başa çatmayan, özbaşına tikili və sökülməsi nəzərdə tutulan əmlak sığortalana bilməz.

Xatırladaq ki, aztəminatlı ailələr əmlakın icbari sığortası ödənişindən azaddırlar. Onların əmlakının sığorta haqqını dövlət qarşılayır. Bunun üçün onların sığorta şirkətinə müraciət etməsi yetərlidir.