Bu gün Vətən müharibəsinin başlanmasının beşinci ildönümüdür. Bu gün bizi böyük və şanlı qələbəyə aparan tarixdir. Məhz bu tarix Azərbaycanın 30 il ərzində düşmən tapdağı altında olan torpaqlarını işğaldan azad etməsi üçün dönüş nöqtəsi oldu. Cəbhədə törədilən erməni təxribatına layiqli cavab verən Azərbaycan Ordusu erməni hərbi birləşmələrini darmadağın edərək, işğal altında olan ərazilərini mənfur düşməndən təmizlədi.

Qələbəyə doğru gedən yolda şanlı Azərbaycan Ordusu Ali Baş Komandanın rəhbərliyi altında əsl tarix yazdı. 44 gün ərzində ərazilərimizin işğaldan azad edilməsi xəbərlərini aldıqca qəlbimizdəki Vətən nisgilinin yerini sevinc və qürur tutdu.

Oxu.Az xatırladır ki, müharibənin ilk günü Azərbaycan Ordusunun sürətli əks-hücum əməliyyatları ilə işğal altındakı altı ərazi azad edilib. Azərbaycan Ordusu üç istiqamətdə - Füzuli, Cəbrayıl və Kəlbəcərdə müharibənin ilk uğurunu qazanıb. Belə ki, Füzulinin Qaraxanbəyli, Qərvənd və Horadiz kəndləri işğaldan azad edilib. Cəbrayılın Böyük Mərcanlı, Nüzgar kəndlərində də işğala son qoyulub. Ordumuzun 27 sentyabrdakı uğurlu əməliyyatları nəticəsində Kəlbəcərin Murovdağ zirvəsi də işğaldan azad edilib.

Lakin mənfur düşmən bu dəfə də öz ənənəsinə sadiq qalaraq mülki əhaliyə qarşı cinayətə imza atıb. Ermənistanın hərbi-siyasi rəhbərliyi öz təxribatçı əməllərinə davam edərək, Cenevrə Konvensiyası ilə üzərinə düşən öhdəliklərini kobud şəkildə pozmaqla dinc Azərbaycan əhalisinin sıx yaşadığı əraziləri ağır silahlardan atəşə tutub. Nəticədə Naftalanda bir ailənin beş üzvü həlak olub. Düşmənin bu dəfə də eyni ssenari ilə hərəkət etməsi onun faşist mahiyyətini dəyişmədiyini ortaya qoyub.

Erməni təxribatlarının qarşısını almaq üçün sentyabrın 27-də Prezident İlham Əliyevin Milli Məclis qarşısında qaldırdığı vəsatət əsasında 28 sentyabr saat 00:00-dan etibarən bütün ölkə üzrə hərbi vəziyyət elan edilib.

Təbii ki, müharibənin ilk günü itkisiz də ötüşməyib. Torpaqlarımızın azadlığı uğrunda qəhrəman əsgərlərimiz, hərbçilərimiz şəhidlik və qazilik mərtəbəsinə yüksəliblər. Bu baxımdan, Prezident İlham Əliyevin 2020-ci ilin 2 dekabrında imzaladığı Sərəncama əsasən, hər il sentyabrın 27-si ölkədə Anım Günü kimi qeyd edilir.