Bilirik ki, hər il bayram öncəsi istər ərzaqların, istərsə də digər məhsulların qiymətlərində artımlar olur. Bəs qiymətlərə nəzarət olunmurmu? Süni artımın qarşısı necə alınmalıdır?
Mövzuyla bağlı BiG.AZ-a iqtisadçı ekspert Turab Rzayev açıqlama verib.
O bildirib ki, iqtisadiyyatda xüsusilə istehlak məhsulları satan müəssisələrdə bunun mədəniyyətini formalaşdırmaq lazımdır:
"Burada əsas məsələ odur ki, azad iqtisadiyyat olduğuna görə, biz bütün qiymətlərə qarışa bilmərik. Avropada, Qərb dünyasında Yeni il bayramı ərəfəsində bütün məhsullarda endirimlər olur. İnsanlar 80-90 faizə kimi endirimlərlə məhsullar ala bilirlərş Bundan əlavə, hədiyyəli satışlar da olur.
Bizdə də bu şəkildə olmalıdır, amma təəssüf ki, tam əksi müşahidə olunur. Həm Yeni il, həm Novruz bayramında qiymətlər daha da artırılır. Bu məsələ ilə bağlı iqtisadi subyektlərdə iş aparılmalıdır.
Bir çox ərzaq məhsulları iri idxalçıların, istehlakçıların nəzarətindədir. Əlbəttə, dövlət onlara birbaşa təzyiq göstərib bu cür süni artımın qarşısını ala bilər. Özəlliklə bayram günləri ilə, gömrükdəki məhdudiyyətlərlə, süni qida artımları ilə bağlı onlara xəbərdarlıq edilə, cəza tədbirləri görülə, müəyyən sanksiyalar qoyula bilər. İqtisadiyyat Nazirliyi müəyyən cəzalandırma, maarifləndirmə və ya çəkindirici tədbirlər görə bilər ki, qiymətlər qalxmasın. Bu məsələ xüsusi nəzarət tələb edir".
Aysel SƏFƏRZADƏ