Tovuz rayonunun Dondar Quşçu kənd sakini 10 yaşlı Nərmin Quliyevanın 2019-cu il noyabrın 21-də itkin düşməsi və bu il yanvarın 6-da yanmış meyitinin tapılması ölkə gündəminin əsas müzakirə mövzusuna çevrilib. Hər kəs sosial media hesabında postlar paylaşaraq , cinayətkarın tapılmasını və ölüm hökmünün bərpa olunaraq, onun Nərminin öldürüldüyü kimi öldürülməsini tələb edib. Cinayəti törədənin kimliyini tapmaq üçün faktla bağlı cinayət işi açılaraq, zəruri əməliyyat-axtarış tədbirləri həyata keçirilib. Məlum olub ki, cinayəti N.Quliyevanın qonşusu, 1973-cü il təvəllüdlü İlkin Süleymanov törədib.

Bəs onu hansı cəza gözləyir?

Mövzu ilə bağlı tanınmış hüquqşunas, vəkil Mehman Muradlı BiG.AZ-a açıqlama verib. O, bildirib ki, cinayətkar ən ağır cəza ilə cəzalandırılacaq:





"Adətən belə cinayətlər on dörd ildən iyirmi ilədək azadlıqdan məhrumetmə və ya ömürlük azadlıqdan məhrumetmə ilə cəzalandırılır. Yəni Nərminin qatilini ömürlük cəza gözləyir. Hər kəsin tələb etdiyi ölüm hökmünə gəlincə isə onu deyə bilərəm ki, Konstitusiyada təsbit olunsa da Avropa Şurasına üzvlüyümüz qəbul edilərkən öhdəlik götürmüşük ki, ölüm hökmünü ləğv edəcəyik. Bunu da etdik".

Lamiyə Məmmədova