Ürək damarlarında tıxanma zamanı tətbiq edilən stentlər minlərlə xəstənin həyatını xilas edir. Ancaq kardiocərrahların sözlərinə görə, hər bir tibbi müdaxilə kimi, stentlərin də müəyyən risk və mənfi tərəfləri mövcuddur.

Cərrah-kardioloq Elçin Məmmədov BiG.AZ-a bildirib ki, stentin ən böyük riski damarda yenidən daralma ehtimalıdır:

"Bəzi hallarda damar stentləndikdən sonra yenidən tutulma baş verə bilər. Xüsusilə siqaret, şəkərli diabet və yüksək xolesterini olan xəstələrdə bu risk daha çox müşahidə olunur. Stent qoyulduqdan sonra xəstənin uzun müddət qan durulaşdırıcı dərmanlardan istifadə etməsi vacibdir. Bu dərmanlar qan laxtalanmasının qarşısını alır, amma eyni zamanda mədə-bağırsaq qanaxması və digər qanaxma risklərini də artırır.

Digər bir problem isə bəzi xəstələrdə orqanizmin stenti xarici cisim kimi qəbul edərək reaksiyalar verməsidir. Bu hallar nadir olsa da, xüsusi nəzarət tələb edir.
Stentin əsas zərərləri bunlardır:
damarda yenidən daralma (restenoz),
qanaxma riski (qan durulaşdırıcılarla bağlı),
nadir hallarda allergik və ya immun reaksiyalar.

Stent qoyulmazdan əvvəl risklər və faydalar hərtərəfli qiymətləndirilir və çox vaxt stent xəstənin həyatını uzatmaq və infarkt riskini azaltmaq üçün ən doğru seçim olur".