Saxta mühərrik yağını müəyyən etmək olduqca çətindir, lakin bu mümkündür.

Oxu.Az xəbər verir ki, bu barədə gazeta.ru-ya rusiyalı avtomobil mütəxəssisi Nikita Rodionov məlumat verib.

"Yoxlamaya qablaşdırmadan başlamağı məsləhət görürəm. Saxta məhsullar orijinal məhsula bənzəyir, lakin müəyyən fərqlər var. Qablaşdırmaya, qapağına, holoqrafik işarələrə diqqət yetirin. Onlar kor-kobud olmalı deyil. Bəzi istehsalçılar qoruyucu halqalardan istifadə edirlər. Sürücü uzun müddət eyni markalı yağdan istifadə edirsə, bəzi fərqlər nəzərə çarpa bilər", - Rodionov bildirib.

Yoxlamanın növbəti mərhələsi loqo, firma şriftləri və brend adına fikir verməkdir. Saxta məhsullarda çox vaxt addan bir hərf və ya loqoda bəzi elementlər əskik olur. Belə saxtakarlıqlara mimikriya deyilir - rəng və şrift baxımından hər şey orijinala çox bənzəyir, lakin yenə də kiçik fərqlər var", - ekspert qeyd edib.

Saxta yağlar adətən daha tünd rəngdədir. Bu, istehsalçıların daha ucuz baza mayesindən istifadə etməsi ilə bağlıdır. Keyfiyyətsiz məhsulun kəskin qoxusu olur, orijinal yağın qoxusu isə daha neytraldır.

Rodionov xəbərdarlıq edib ki, saxta yağlar çökə və aşağı temperaturda qatılaşaraq, sıyıq halına gələ bilər.