Moskvanın (Rusiya) Taqanski Rayon Məhkəməsi məşhur "Telegram" mesencerini 4 milyon rubl (74.8 min manat) cərimələyib.

Oxu.Az xəbər verir ki, bu barədə Moskva şəhərinin ümumi yurisdiksiya məhkəmələrinin rəsmi "Telegram" kanalı məlumat yayıb.

Şirkət Rusiyada qadağan edilmiş məlumatların silinməməsinə görə cərimələnib (RF İnzibati Xətalar Məcəlləsinin 13.41-ci maddəsinin 2-ci hissəsi).

"RIA Novosti"nin məlumatına görə, söhbət Rusiya ordusunun Ukraynadakı xüsusi əməliyyat zonasında hərəkətləri ilə bağlı yayılan yanlış məlumatlardan gedir.

Xatırladaq ki, iyulun 8-də Moskva məhkəməsi oxşar maddə ilə "Telegram"ı cərimələyib. Həmin vaxt şirkətə 3 milyon rubl (56.1 min manat) ödəməli olub. Məlum olub ki, mesencer anti-Rusiya hərəkətləri ilə bağlı məlumatları silməyib.