Həyatda uğur müəyyən dərəcədə sizin üz ifadələrinizdən asılıdır. Alimlər insan üzünün ifadəli mimikasının təkamül yolu ilə əldə edildiyini irəli sürürlər.

Lent.az xarici KİV-ə istinadən xəbər verir ki, yeni elmi araşdırma, üz ifadəsi olan insanların daha çox fayda əldə etdiyini göstərir.

Nottingem Trent Universitetinin (Böyük Britaniya) alimləri sübut ediblər ki, daha ifadəli sifətə malik olan insanlar başqaları tərəfindən daha çox bəyənilir, daha xoş və ekstrovert hesab edilir və daha da yaxşı danışıq aparırlar.

1300-dən çox şəxsin iştirak etdiyi iki araşdırmada tədqiqatçılar bəzi insanların digərlərindən nəzərəçarpacaq dərəcədə daha ifadəli üz quruluşuna malik olduğunu müəyyən ediblər. Üstəlik, bu, müxtəlif növ sosial tərəfdaşlarla ünsiyyət qurarkən fərqli vəziyyətlərdə davam edən sabit fərdi xüsusiyyətdir.

Tədqiqatçılar deyirlər ki, üz ifadəliliyi insanın şəxsiyyəti ilə əlaqələndirilir, daha məqbul, ekstrovert və nevrotik insanlar daha canlı üzlər nümayiş etdirirlər. Lakin sifətin ifadəliliyi fərdin təsirini aşan konkret sosial faydalara da çevrilir.

Alimlər "danışıq tapşırığı" ilə təcrübə aparıblar və aşkar ediblər ki, daha ifadəli insanlar mükafatdan daha çox pay alacaqlar, ancaq onlarla söhbət etmək də xoş olarsa. Tədqiqatçılar təklif edirlər ki, xoş insanlarda dinamik üz ifadələri münasibət qurmaq və münaqişələri həll etmək üçün bir vasitə ola bilər.

Ümumilikdə, nəticələr göstərir ki, ifadəli üz simpatiya, əməkdaşlıq və daha yaxşı qarşılıqlı əlaqələri təşviq edən "sosial yapışqan" kimi fəaliyyət göstərir. Kənar müşahidəçilər və həmsöhbətlər ardıcıl olaraq daha ifadəli insanları çox sevimli kimi qiymətləndirirlər. Bundan əlavə, eksperiment göstərib ki, ifadəli üz daha çox "oxunan" kimi qəbul edilir, yəni başqalarının həmsöhbətin niyyətlərini və psixi vəziyyətini başa düşməsini asanlaşdırır.

"Bizim tapıntılar göstərir ki, üz ifadəliliyi müsbət sosial nəticələrlə əlaqələndirilir. Bu, daha ifadəli insanların sosial tərəfdaşları cəlb etməkdə və əlaqələr qurmaqda uğurlu olduğunu işarə edir. Münaqişənin həlli üçün də vacib ola bilər", - tədqiqatçılar bildirib.

Bu tapıntılar həm də "poker üzünün" (yəni, üz ifadəsini mümkün qədər neytral saxlamaq) ən faydalı üz ifadəsi olması fikrini şübhə altına alır. Alimlər deyirlər ki, əksər insanlar üçün üzdə daxili vəziyyət və niyyət nümayiş etdirmək daha isti reaksiyalara, sosial mükafatlara səbəb ola bilər. Tədqiqatçıların fikrincə, ifadəli üz sosial birliyi və əməkdaşlığı yaxşılaşdıran təkamül uyğunlaşmasıdır.