"Milli Məclisin komitə iclaslarında müzakirələr aparılıb və pensiya kapitalına və xüsusən də pensiya kapitalı formalaşdıran şəxsin istifadəsi imkanları, o cümlədən onun bir hissəsinin vərəsiyə transfer imkanları araşdırılıb".

Bunu BAKU.WS-ə açıqlamasında 6-cı çağırış Milli Məclisin deputatı, iqtisadçı alim Vüqar Bayramov deyib.

O bildirib ki, minimum pensiya kapitalı ilə yanaşı, həm də orta pensiya kapitalının məbləğinin müəyyənləşdirilməsi, orta pensiya kapitalından artıq olan hissənin daha tez, yəni pensiya yaşına çatmadan istifadə imkanları verilməsini təklif edib:

"Düşünürəm ki, bu istiqamətdə müzakirələrin aparılması rəsmi qərarların verilməsini məqsədəuyğun hesab edə bilər. Çünki nəticə etibarı ilə pensiya kapitalından səmərəli istifadə etmək, həm də pensiya kapitalının yığılması və marağın artmasına gətirib çıxara bilər.

Xüsusən bir sıra inkişaf etmiş ölkələrdə olan modelin tətbiqi, o cümlədən ABŞ-dəki modelinin tətbiqi pensiya kapitalına yığımların həm maraq olaraq artmasına, həm məşğulluğun rəsmiləşdirilməsinə səbəb ola bilər. Bu proses qeyri-rəsmi məşğulluğun rəsmiləşdirilməsi və daha çox əmək müqavilələrinin bağlanması, əmək müqavilələrində maaşların daha doğru qeyd olunması kimi məsələlərin prioritetləşməsinə və dövlət gəlirlərimizin artmasına, eləcə də pensiya kapitalından daha səmərəli istifadəyə rəvac verəcək".