Badamdar avtomobil bazarından satıcılar da ikinci əl avtomobillərin qiymətlərinin şişirdildiyini deyirlər. İkinci əl avtomobil bazarında avtomobillərin qiymətləri şişirdilir.

Bu barədə fins.az-a avtomobil ekspertləri və avtomobil satıcıları bildirib. Avtomobil ekspertlərinin sözlərinə görə, avqust ayının sonundan etibarən dolların bahalaşması ilə bağlı yaranan ajiotaj avtomobil satışlarının da tamamilə dayanmasına səbəb olmuşdu. Ekspertlər deyirlər ki, satışların dayanmasına rəğmən devalvasiyaya uyğun olaraq avtomobillərin qiymətlərini qaldırılmışdı. Xüsusilə də avtomobil satışı ilə bağlı internet elanlarında şişirdilmiş qiymətlər gözə çarpırdı. Amma real alıcı olanda avtomobillər nəğd şəkildə daha ucuz təklif edilirdi.

Badamdar avtomobil bazarından satıcılar da ikinci əl avtomobillərin qiymətlərinin şişirdildiyini deyirlər. Avtomobil satıcısı Aley Şamilov bildirib ki, sentyabr ayının əvvəlindən etibarən elan saytlarında ikinci əl avtomobillərin qiymətlərinin artması təəssüratı yaradılırdı. Avtomobillər real qiymətindən 6000 manata kimi baha göstərilirdi.Sentyabr ayının 10-dan sonra avtomobil bazarında az da olsa, alıcı var və avtomobillərin real satış qiymətinin artmadığı məlum olub: "Məsələn, qiyməti 26 min manat göstərilən 2014-cü il model "Hyundai İX35” avtomobili son bazarda 18 min manata satıldı. 2008-2009-cu il model "Toyota Prado”ların qiyməti 27-29 min manat göstərilirdi. Amma eyni avtomobil real alıcıya 22 min manata satıldı”.

Ötən ilin eyni dövrü ilə müqayisədə xeyli az olsa da, son iki həftədə avtomobil satışlarında nisbi canlanma yaranıb. A.Şamilov bildirib ki, satışa 1500 -2000 avtomobil çıxarılan Badamdar bazarında son bir ayda cəmi 10-12 avtomobil satılıb. Halbuki, ötən ilin sentyabr ayında 80-100 avtomobil satılmışdı. Satıcının sözlərinə görə, bazarda real alıcı hələ də çox azdır: "Satışların bir hissəsi barter hesabına baş tutur. Məsələn, 1996-cı il model "Mercedes” avtomobilini "E240” modeli ilə barter etdilər. "E240 ”a əvvəlcə 14 min manat qiymət qoyulsa da, sonda avtomobil 12 min manata satıldı. Köhnə "Mercedes”in sahibi avtomobilin üstündə 7 min manat ödəməklə "E240” modelini aldı”.

Bundan əlavə, bazara çıxarılan avtomobilin bir hissəsini alverçilər alıb saxlayırlar. Onlar isə ikinci əl avtomobil bazarında qiymətlər yüksələn zaman daha baha qiymətə sataraq daha çox gəlir əldə etmək üçün belə edirlər.

Satıcıların sözlərinə görə, "ölü bazar”ın əsas "söz sahibləri” dəyişməz olaraq qalıb. A.Şamilov bildirib ki, əsas alınan avtomobillər arasında 1998-2003-ci il istehsal tarixli "Mercedes”ləri misal göstərmək olar. Xüsusilə də, "E 220” modellərini taksi kimi istifadə etmək üçün alırlar. "Opel”in isə 1.6-1.8l mühərrikli 1998-2004-ci illərdə istehsal edilən furqon modelləri daha çox satılır. "Lada” modellərindən isə alıcılar daha çox "Lada 21012”, "Lada 21015” modellərinə üstünlük verirlər.

Bu gün Bakı Ağır Cinayətlər Məhkəməsində oğurluqda təqsirləndirilən Esmira Cəfərovanın şikayəti əsasında məhkəmə prosesi başlayıb.

APA-nın məlumatına görə, hakim Azər Orucovun sədrliyi ilə keçirilən prosesdə təqsirləndirilən E. Cəfərova bildirib ki, iki il öncə həbs edilərkən hamilə olub.

O, həbsxanada uşaq dünyaya gətirdiyini və uşağa baxmaq üçün barəsində olan cinayətinə xitam verilməsini istəyib: "Qızım 1 yaş 8 aylıqdır. Sizdən xahiş edirəm ki, vəziyyətimi nəzərə alaraq, körpənin qayğısına qalmaq üçün məni həbsdən azad edəsiniz".

Məhkəmə baxışı sentyabrın 30-na təyin edilib.

Xatırladaq ki, E. Cəfərova 2014-cü ildə oğurluqda təqsirləndirilərək 6 il 6 ay müddətində azadlıqdan məhrum edilib.

Bu gün Milli Məclisin İqtisadi siyasət, sənaye və sahibkarlıq komitəsinin iclası keçirilib.

"APA-Economics" xəbər verir ki, iclasda "Daşınmaz əmlakın dövlət reyestri haqqında" Azərbaycan respublikasının Qanununda dəyişikliklər edilməsi barədə” qanun layihəsi müzakirə edilib.

Qanuna dəyişiklik barədə məlumat verən Əmlak Məsələləri Dövlət Komitəsinin Hüquq şöbəsinin müdiri İlqar Hüseynov deyib ki, qanuna dəyişiklik torpaq mülkiyyətçilərinin hüquqlarının qorunmasına və vətəndaş məmnunluğunun artırılmasına hesablanıb.

Qanun layihəsinə edilən dəyişikliklərə əsasən, icarədə və ya istifadədə olan torpaq sahəsində yerləşən hündürlüyü 12 metrədək olan yaşayış evləri torpaq sahəsi üzərində icarə və ya istifadə hüququnu təsdiq edən sənəd, müvafiq icra hakimiyyəti orqanı ilə razılaşdırılmış layihə və yaşayış evinin istismara qəbul aktı olduğu təqdirdə daşınmaz əmlak üzərində hüquqlar dövlət qeydiyyatına alınacaq.

Qanuna təklif edilən digər mühüm dəyişikliyə əsasən, 2013-cü ilin yanvarın 1-dək inşa edilmiş tikililərdə məqsədli təyinatına görə yaşayış evinin tikintisi üçün nəzərdə tutulmuş xüsusi mülkiyyətdə olan torpaq sahəsində yerləşən hündürlüyü 12 metrədək olan yaşayış evlərinin qeydiyyatı üçün yalnız torpaq sahəsi üzərində mülkiyyət hüququnu təsdiq edən sənəd tələb olunacaq. Sadə dillə desək, 2013-cü ilin yanvarın 1-dək hündürlüyü 12 metrədək olan fərdi yaşayış evi inşa edənlər yalnız torpaq üzərində mülkiyyət hüququnu təsdiq edən sənədi təqdim etməklə daşınmaz əmlak üzərində mülkiyyət hüququna yiyələnəcək.

Qanun layihəsi Milli Məclisin Plenar iclasına tövsiyə olunub.

UEFA prezidenti Aleksandr Çeferin sabah "Bakcell Arena"da olacaq.

May.Az-in AFFA-nın rəsmi saytına istinadən verdiyi məlumata görə, A.Çeferin Avropa Liqasının C qrupunda keçiriləcək "Qəbələ" - "Maynts" (Almaniya) oyununu izləyəcək.

O, AVRO-2020-nin 4 oyununun ev sahibi şəhəri- Bakının loqosunun sentyabrın 30-da keçiriləcək təqdimat mərasimində iştirak etmək üçün paytaxta səfər edəcək.

Şahin Həbibov

Sabah Bakıda və Abşeron yarımadasında bəzi yerlərdə yağış yağacaq, gündüz yağışda fasilə olacaq.

Ekologiya və Təbii Sərvətlər Nazirliyinin Milli Hidrometeorologiya Departamentindən May.Az-a verilən məlumata görə, arabir güclənən şimal-qərb küləyi günün ikinci yarısında mülayimləşəcək.

Havanın temperaturu Abşeron yarımadasında gecə 15-17, gündüz 18-22 dərəcə isti, Bakıda gecə 15-17, gündüz 20-22 dərəcə isti olacağı gözlənilir.
Azərbaycanın rayonlarında sentyabrın 29-da şimşək çaxacağı, arabir yağış yağacağı gözlənilir. Bəzi yerlərdə intensiv olacağı ehtimalı var. Gündüz yağıntılarda qısa müddətə fasilə yaranacaq. Qərb küləyi ayrı-ayrı yerlərdə arabir güclənəcək.

Havanın temperaturu gecə 11-16, gündüz 19-24 dərəcə isti, dağlarda gecə 3-8, gündüz 9-14 dərəcə isti olacağı gözlənilir.

Şahin Həbibov

Maştağa qəsəbəsində apteklərdən birindən güclü təsiredici dərman preparatları aşkar edilərək götürülüb.

Daxili İşlər Nazirliyindən May.Az-a verilən məlumata görə, narkotiklərlə Mübarizə İdarəsi əməkdaşlarının həyata keçirdikləri əməliyyat-axtarış tədbirləri nəticəsində Maştağa qəsəbəsinin ərazisində qəsəbə sakini Elnarə Hüseynova satıcı işlədiyi aptekdə güclü təsiredici maddə olan 5 ədəd "Pregabalin” kapsulasını satarkən saxlanılıb.

Aptekə baxış zamanı güclü təsiredici maddə olan 306 ədəd "Tramadol”, 3 ədəd "Pregabalin” kapsulaları, 20 ədəd "Zapicione” həbi, 5 ədəd "Tramadol”, 7 ədəd "Tramaklosidol” ineksiyaları, psixotrop maddə olan 780 ədəd "Fenadiazepin”, 2075 ədəd "Haloperidol”, 150 ədəd "Depakine chrono”, 60 ədəd "Respilon” həbləri, 30 ədəd "Haloperidol”, 24 ədəd "Haloperidol-decanoate”, 70 ədəd "Amitriptylline hydrochlorido” və 19 ədəd "Moditen depo” ineksiyaları aşkar edilərək götürülüb.

Qobustan rayonunda gənc ana intihar edib.

APA-nın yerli bürosunun xəbərinə görə, Ərəbşalbaş kənd sakini, 1991-ci il təvəllüdlü Məmmədova İntizar Qafur qızı yaşadığı evdə özünü kəndirlə asıb.

Üç uşaq anası olan İntizar Məmmədovanın özünə qəsd etməsinin səbəbi hələlik məlum deyil.

Faktla bağlı Qobustan rayon Prokurorluğu tərəfindən araşdırma aparılır.

Bakı şəhəri Nizami rayonunda yerləşən Bakı Qida Sənayesi Kollecinin ərazisinə müdaxilə faktı aşkar edilib.

Təhsil Nazirliyindən May.Az verilən məlumata görə, kollecin ərazisindəki futbol meydançasının üzərində "İnteks MMC” şirkəti tərəfindən yeni yaşayış kompleksinin inşaat işlərinə başlanılıb. Bununla əlaqədar təhsil müəssisəsinin binasının zirzəmisində və bəzi sinif otaqlarında çatlar yaranıb. Tikinti işlərinə cəlb olunan texnikanın kollecin tədris binasına çox yaxın olması, özül üçün qazıntı işlərinin aparılması binanın möhkəmliyinə zərər yetirib.

Aparılan tikinti işləri tədris prosesinin gedişinə ciddi maneə törətməklə yanaşı kollecin pedaqoji və tələbə kontingentinin həyat və sağlamlığı üçün təhlükə törədir.
Bakı Qida Sənayesi Kollecinin direktoru Anar Mayılov səhlənkarlıq göstərərək kollecin ərazisinə müdaxilənin qarşısının alınması üçün lazımı tədbirlər görməmişdir. Yol verdiyi nöqsanlara görə A.Mayılov təhsil nazirinin müvafiq əmri ilə 23 sentyabr 2016-cı il tarixində tutduğu vəzifədən azad edilmişdir. Qeyd olunan ərazidə tikinti işlərinin dərhal dayandırılması barədə aidiyyəti dövlət qurumlarının qarşısında məsələ qaldırılmışdır.

Təhsil müəssisələrinin ərazilərinin zəbt olunmasına cəhd edənlər birmənalı şəkildə qəbul etməlidir ki, bu cür hərəkətlərlə təhsilalanların Konistitusiya hüquqlarının pozulmasına səbəb olurlar. Təhsil müəssisələrinin ərazilərinin zəbt olunması hallarına qarşı Azərbaycan Respublikası qanunvericiliyi çərçivəsində ciddi mübarizə tədbirləri davam etdiriləcəkdir.

Şahin Həbibov

Seçdiyi sənətin peşəkarı olan qaynaqçı və rəngsaz qadın gördüyü işlərə görə kişilərdən heç də geri qalmır. Adətən kişilərin çalışdığı bu ağır sahədə qadınların işlədiyini görəndə hamı təəccüblənir.

AZƏRTAC xəbər verir ki, Ağdaş rayonunda yaşayan Yeganə Mustafayeva sənəti ilə insanların böyük marağına səbəb olur. O, neçə ildir ki, qaynaqçı, rəngsaz və dizayner kimi öz emalatxanasında çalışaraq ailəsini dolandırır. Günün əsas hissəsini qaynaqçı sexində keçirən Yeganənin zərif əlləri bu ağır işdə kobudlaşıb.

Lakin o, gördüyü işdən heç də yorulmur, əksinə, həvəslə metaldan məişət əşyaları, xüsusən də masa və oturacaqlar, qapı və pəncərələr, uşaq əyləncə mərkəzləri üçün kiçik attraksionlar, müxtəlif ölçüdə və dizaynda məhəccərlər, çardaq və digər əşyalar hazırlayır. Sifarişlər əsasında metaldan 15-ə yaxın məişət əşyası hazırlayan usta xanım etiraf edir ki, bu sənət qadın işi deyil. Çünki qadın ağır metalları qaldırır, onları qaynaq etdikdən sonra gözlərinin ağrısına dözməli olur. Belə çətin işə adətən zərif cinsin nümayəndələri maraq göstərməsə də, Yeganə Mustafayeva bu işin öhdəsindən gələ bilir. O, qışın soyuğunda və yayın istisində qaynaq işlərinin çətinliklərinə dözür. Çünki əldə etdiyi halal qazancla ailəsinə çörək aparır. Əlini ağır işə alışdıraraq bu sənətin sirlərini öyrənib. Elə bunun nəticəsidir ki, bu vaxta qədər hazırladığı əşyalardan heç kim şikayət etməyib. Əksinə, razı qalanların sayı daha çox olub.

Qaynaqçılıq sənətinin sirlərini Ağdaşda 30 ildən çoxdur usta işləyən Çingiz Baxışovdan öyrənən Yeganə gördüyü işlərə görə kişi qaynaqçılardan heç də geri qalmır. İşinə daim məsuliyyətlə yanaşan zəhmətkeş qadının səliqə ilə hazırladığı əşyalar keyfiyyəti və möhkəmliyi ilə seçilir. Əvvəlcə hazırlayacağı əşyanın maketini qurur, sonra dəmiri lazımi ölçüdə kəsərək onu qaynaq etməklə birləşdirir.

Yeganə Mustafayevanın əşyalara yumşaq dəri materialından üzlük çəkməklə bağlı dərzilik bacarığı da var. Eyni zamanda hazırladığı bütün əşyaları xüsusi zövqlə boyamaqla onları daha da gözəlləşdirir.

Ukraynada azərbaycanlı tələbə qətlə yetirilib.

APA-nın məlumatına görə, hadisə sentyabrın 27-də Kiyev şəhərində qeydə alınıb. Zaqatala rayon sakini, 22 yaşlı Məhəmməd Amil oğlu Səfərəliyev naməlum şəxslər tərəfindən bıçaqlanaraq qətlə yetirilib.

Mərhumun meyiti bu günlərdə Azərbaycana gətiriləcək.

Qeyd edək ki, M. Səfərəliyev Ukraynada ali təhsil alırmış.

Türkiyədə fəaliyyət göstərən azərbaycanlı model Günay Musayeva labioplastika əməliyyatı (cinsiyyət orqanının plastik əməliyyatı-red) keçirəcək.

May.Az xəbər verir ki o, axşam.az-a açıqlamasında bu haqda danışıb. Bildirib ki, əməliyyat Livanın paytaxtı Beyrutda olacaq:

"Mən qadın sünnəti əməliyyatına gedirəm. Qadın sünnəti deyilən bir şey var. Hamı elə bilir ki, təkcə kişilərdə sünnət olur. Amma qadınlar da sünnət etdirir. Mən də Beyruta sünnət etdirməyə gedirəm (Labioplastikanı nəzərdə tutur-red). Əslində, çox da ağır əməliyyat deyil. Bir çoxları bunu tam başa düşməyə bilər. Amma tibdə xanımların sünnət olunması var. Məncə, bu sünnəti çox qadınlar etdirməlidir. Genital bölgədə estetik cəhətdən çox yaxşı görünüş olur. Dünyanın ən yaxşı estetik cərrahları Beyrutdadır. Hətta Hollivud ulduzları da plastik əməliyyat üçün ora müraciət edir. Bir-iki gün sonra Türkiyəyə qayıdacağam”.

Qeyd edək ki, son illərdə digər plastik əməliyyatlar ilə yanaşı, cinsi orqanlarda icra olunan plastik əməliyyatlar geniş tətbiq olunur. Genital plastik əməliyyatlar içində ən çox icra olunan labioplastika (cinsiyyətin kiçik dodağının plastikası) və vaginaplastikadır (uşaqlıq yolunun daraldılması).

Avqustun 17-dən 18-nə keçən gecə İstanbulda qətlə yetirilən Rövşən Canıyevin ("Lənkəranski”) ötən həftə sonu 40 mərasimi keçirilib. Bu müddətdə "Lənkəranski”nin qətli ilə bağlı bir çox suallar açıq qalıb.

May.Az xəbər verir ki, musavat.com-un yazdığına görə, Lənkəranskinin 40 mərasimində Türkiyədən çox nüfuzlu avtoritet gəlib. Həmin nüfuzlu avtoritet Türkiyədə "Lənkəranski”nin yerinə kimin olacağı ilə bağlı söhbət aparıb.

Mənbə deyib ki, "Lənkəranski”nin ən yaxın adamı, qətlidən sonra İstanbulda həbs edilən "Hacı Beyləqanski” indilikdə klana rəhbərlik etmək durumunda deyil. Qeyd edək ki, İstanbul polisi onun bir neçə qətldə əli olduğundan şübhələnib və avqustun 18-dən həbsdədir. Mənbə bildirib ki, bu səbəbdən məsləhətləşmələrdən sonra klanın Türkiyəyə cavabdeh şəxsi kimi gürcü Qoça tanınıb.

Sayt yazır ki, böyük ehtimalla söhbət "Kurşa” ləqəbi ilə tanınan Qoça Çinçaridzeden gedir. Çünki o da son illər Türkiyəyə mütəmadi olaraq gedib-gəlirdi.

Qoça 5 iyul 1972-ci ildə Kabuletidə (Gürcüstan) anadan olub. O, "qanuni oğru” adını 1992-ci ildə, cəmi 19 yaşı olanda alıb.

Moskva, Odessa və Ukraynada məskunlaşan Qoça son illər Türkiyədə sığanacaq tapıb. 44 yaşlı "qanuni oğru”ilk dəfə 1993-cü ildə Batumidə həbs edilib və 6 ay dustaq həyatı yaşayıb. 2006-cü ildə Moskvada yenidən həbs edilən "Kurşa”6 aydan sonra yenə azadlığa buraxılıb. Rusiyada sonuncu dəfə 2006-cü ildə deportasiya olunub və o zamandan şimala üz tutmayıb.

Son 10 ildə də o, Ukraynada, əsasən də Odessada məskunlaşıb. Belə güman etmək olar ki, "Rövşən Lənkəranski” Türkiyədə məskunlaşandan sonra o da bu ölkəyə köçüb. Sonuncu dəfə onu Ukraynadan bu ilin aprelində deportasiya ediblər. "Kurşa”nın 2013-cü ildə Gürcüstanda böyük amnistiya nəticəsində həbsdən azad edildiyi qeyd olunsa da, onun hansı səbəbdən mühakimə olunduğu haqda "oğru bioqrafiyasında” məlumat yoxdur.

Bildirək ki, bu günlərdə Berlində "Lənkəranski”nin düşmənlərinə qarşı türk və çeçen mafia klanlarının birləşməsi xəbəri də yayılmışdı. Bildirilirdi ki, klanların birləşməsi "Rövşən Lənkəranski”nin yaxın dostu və Avropa "obşakı"na (xəzinəsinə) nəzarət edən çeçen Həmzət Qastamirovun ("Şeyx Həmzət”) təşəbbüsü ilə baş verib. Mənbənin bildirdiyinə görə, belə bir birləşmə kriminal aləmdə son 26 ildə ilk dəfə baş verir.