Qondarma Talışıstançılar fəallaşıb: "Cinayət məsuliyyətinə cəlb oluna bilərlər" - FOTOFAKT

Son günlər sosial şəbəkələrdə talışlar fəallaşmağa başlayıblar. Belə ki, onlar təşkilatlanaraq xüsusi səhifələr yaradıblar və yaxın gələcəkə Azərbaycanın Talışıstan olacağı ilə bağlı separatçı fikirlər yaymağa başlayıblar.
BiG.AZ xəbər verir ki, bunun bariz nümunəsi olaraq yaradılmış səhifə Talış bayrağı ilə Masallı rayonunun girişində şəkil çəkdirən bir şəxsin fotoşəklini yayımlayıb.
Talışların aktivləşməsi, onların sosial şəbəkədə müəyyənləşdirilərək hüquq-mühafizə orqanları tərəfindən xüsusi tədbirlərin görülməsi ilə bağlı BiG.AZ-a danışan "Polisə Dəstək" İctimai Birliyinin sədri və Azərbaycan Respublikasının Prezidenti yanında Dövlət Qulluğu Məsələləri üzrə Komissiyanın müsahibələrin aparılması və nəticələrinin qiymətləndirilməsi üzrə ekspertidi Şəmsəddin Əliyev bunun Azərbaycan Respublikasının Konstitusiyasına zidd olduğunu bildirdi: "Mən özüm də cənub bölgəsindənəm və bunun birbaşa əleyhinəyəm. Əgər hər hansısa sosial klub belə bir addımlar atırsa, bu kimi çağırışlar edirsə bu Azərbaycanın konstitusiyasına, qanunlarına ziddir. Azərbaycanın bu istiqamətdə kifayət qədər sərt qanunları var, cinayət qanunvericiliyi bu kimi əməlləri qadağan edir. Belə hallar çılpaqlığı ilə baş verərsə onlar cinayət məsuliyyətinə cəlb oluna bilərlər.
Cənub bölgəsinin əlahiddə şəkildə, muxtariyyət şəkildə fəaliyyət göstərməsinin əleyhinəyəm. Buna heç bir zərurət və ehtiyyac yoxdur. Kimliyindən asılı olmayaraq hər bir kəsin şəxsiyyət vəsiqəsinə azərbaycanlı sözü yazılır. Biz hər birimiz azərbaycanlıyıq. Heç kimin şəxsiyyət vəsiqəsində milliyətinə, mənsubiyyətinə talış yazılmayıb. Biz tarixən də azərbaycanlı olmağın fövqündə olmuşuq və Azərbaycanın müstəqilliyini, ərazi bütövlüyünü tanımışıq, onu qorumuşuq.
Bu gün belə səs küy edənlər, hayqıranlar yalnız və yalnız öz həyatlarını və o bölgədən olan ziyalıların, insanların həyatlarını təhlükə altına atmış olurlar. Sağlam düşüncəli insanlar belə hallara qarşı olmalıdırlar. Biz bir dəfə bunun acısını yaşadıq, ziyalılarımız, insanlarımız nələr yaşadı bunun canlı şahidi olduq. Daha belə şeylərin olmasını istəmirik. Mən bunu qınayıram, ayıbdır. Belə insanlar küləyin istiqamətinə əsən yarpaqlar kimidirlər.
Onları hərəkətə gətirən, şirnikləndirən qüvvələr var. Burada həm xarici ölkələrin də əli ola bilər, Azərbaycan dövlətinin bugünki inkişafını gözü götürməyən, paxıllıq edən insanlar da ola bilər. Həmçinin həmin bölgələrdən olan insanlar ki, xarici ölkələrdə sığınacaq tapıblar oradan başqa qüvvələrin, mənfur düşmənlərimizin təsiri ilə belə çağırışlar edirlər, təxribatlara uyurlar. Sadəcə olaraq onlara ar olsun".
-Bu İranda yaşayan və Azərbaycanın uğurlarına qısqanclıq edən farsların işi ola bilərmi?
-Talış dili demək olar ki, fars mənşəli sözlərdən ibarətdir amma hesab etmirəm ki, talışlar farsların diktəsi ilə belə bir çağırışlar, təbliğatlar apara bilməzlər və aparmazlar. Çünki farslar Ermənistanla Azərbaycan münasibətlərində Azərbaycanın ərazi bütövlüyünü türklər kimi dəstəkləmədiyinə görə inanmıram ki talışlar farsların diktəsi ilə hərəkət etsinlər. Sadəcə olaraq öncə qeyd etdiyim kimi Azərbaycanın hüdudlarından kənarda olan insanların işləridir.