Yuxunun bədən çəkisinə təsiri - Həkimdən XƏBƏRDARLIQ

Kifayət qədər yuxu insanın bədən çəkisini tənzimləməsində qidalanma və fiziki aktivlik qədər vacib rol oynayır. 

BAKU.WS xəbər verir ki, bu barədə həkim-ekspert Vera Serejina "RİA Novosti"yə açıqlamasında bildirib.

Mütəxəssisin sözlərinə görə, yuxusuzluq və yuxunun kifayət qədər olmaması orqanizmdə hormonal disbalansa səbəb olur. Belə ki, bu zaman "aclıq hormonu" – qrelinin səviyyəsi yüksəlir, "toxluq hormonu" – leptinin səviyyəsi isə azalır. Nəticədə insanın iştahı artır, yüksək kalorili və şəkərli qidalara meyl güclənir.

Serejina qeyd edib ki, yuxu zamanı orqanizm enerji sərf edir, lakin bu enerji qida vasitəsilə bərpa olunmur, yəni orqanizm təbii şəkildə enerji itirir. Eyni zamanda, bu dövrdə bədəndə melatonin hormonu istehsal olunur ki, o da ən aktiv şəkildə saat 22:00-dan 01:00-a qədər fəaliyyət göstərir. Melatonin həm yuxu keyfiyyətini artırır, həm də maddələr mübadiləsini tənzimləyərək yağların parçalanmasına kömək edir.

Ekspertin fikrincə, mükəmməl pəhriz və müntəzəm idman belə, daimi yuxu çatışmazlığını kompensasiya edə bilmir. Orqanizmin bərpası, hormon balansının normallaşması və arıqlama prosesinin effektiv getməsi üçün insan gündəlik 7-9 saat yatmalıdır. Bundan əlavə, sabit yuxu rejimi saxlamaq, yuxudan öncə parlaq ekranlardan uzaq durmaq və rahat, sakit mühit yaratmaq vacibdir.

Serejina həmçinin əlavə edib ki, bəzən insanlar arıqlamaq üçün yalnız kalori hesabına və idmana diqqət yetirirlər, lakin yuxu rejimini pozmaq bütün səyləri nəticəsiz edir. Yuxu çatışmazlığı bədənə stress kimi təsir edir, bu isə kortizol hormonunun səviyyəsini yüksəldərək yağ yığılmasını sürətləndirir.