Günə kofe içərək başlayanlar mütləq oxusun - Bu saatlarda qətiyyən OLMAZ

Bir çox insan günə oyanmaq üçün ilk iş kimi qəhvəyə üz tutur. Lakin mütəxəssislər səhər acqarına kofe içməyin sağlamlığa mənfi təsir göstərə biləcəyini bildirirlər. 

BAKU.WS xəbər verir ki, kofein beyin fəaliyyətini artıraraq yuxululuğu azaldır, əhvalı yüksəldir və metabolizmanı sürətləndirir. Buna baxmayaraq, acqarına qəbul edildikdə qəhvə mədədə turşuluğu artırır, yanma və qaz problemlərinə səbəb ola bilər.

Bundan əlavə, səhər saatlarında bədəndə təbii olaraq yüksələn kortizol hormonu kofeinlə birlikdə normadan artıq səviyyəyə çata bilər. Bu isə gün ərzində enerjinin tez tükənməsinə və əsəbilik hissinə yol aça bilər.

Mütəxəssislərin fikrincə, qəhvədən düzgün faydalanmaq üçün onu oyandıqdan 1–2 saat sonra, yəni təxminən səhər 9:30–11:00 arası içmək daha məqsədəuyğundur.

Qəhvəni səhər yeməyindən sonra içmək, həm mədə turşuluğunun qarşısını alır, həm də bədənə daha uzunmüddətli enerji verir.

Həkimlər xüsusilə ürək-damar və mədə problemləri olan şəxslərə gündə 1–2 fincandan artıq qəhvə qəbul etməməyi tövsiyə edirlər.