İngiltərənin "Liverpul" və İspaniyanın "Barselona" klublarının keçmiş futbolçusu, argentinalı Xavyer Maskerano ABŞ-nin "İnter Mayami" klubunun baş məşqçisi olub.

Oxu.Az xəbər verir ki, bu barədə klubun mətbuat xidməti məlumat yayıb.

Müqavilə 2027-ci il mövsümünün sonuna qədər nəzərdə tutulub.

Maskerano "İnter Mayami"də müqaviləsi noyabrın 22-də başa çatan argentinalı Xerardo Martinonu əvəzləyib.

Xatırladaq ki, hazırda "İnter Mayami"nin heyətində əvvəllər Maskerano ilə "Barselona"da oynamış Lionel Messi, Serxio Busquets, Luis Suares və Xordi Alba çıxış edir.