İyulun 15-də Türkiyədə baş verən hərbi çevrilişə cəhd gecəsində haqqında danışılanlardan biri də TRT-nin aparıcısı Tijen Karaşdır.

May.az xatırladır ki, Türk Silahlı Qüvvələrinin qiyam zamanı aparıcıya bəyanat oxutdurmuşdular. Daha dəqiq söyləsək o, qiyamçıların bildirişini canlı yayımda bir neçə saat ardıcıl şəkildə oxuyaraq insanların diqqətini çəkmişdi. Həyəcanı səsindən və simasından bəlli olsa da, T.Karaş işini peşəkar səviyyədə görmüşdü.
Onu da deyək ki, son günlər internetdə ən çox axtarılan Tijen Karaşdır.

Bunu nəzərə alıb, BAKU.WS oxucularına 15 iyul qəhrəmanı haqda məlumat veririk. Beləliklə, Tijen Karaş 1975-ci il yanvarın 25-də də Ankarada doğulub. Üç uşaqlı ailənin ortancıl qızı olan spiker bir müddət Kanal D-də də aparıcı kimi görünüb. Uzun illərdir TRT-də işləyən T.Karaş 2000-ci ildə TRT-də "Yaşam ve Gençlik” adlı proqrama aparıcılıq edib. TRT Avrasya, TRT Int və TRT Türk-də müxtəlif verilişləri aparıb.