Praktik olaraq Amerika hərbi qulluqçularının yarısı əmindir ki, ABŞ növbəti ildə genişmiqyaslı müharibəyə cəlb ediləcək.

MAY.AZ publika.az-a istinadən xəbər verir ki, bunu “Military Times” portalı tərəfindən dərc edilmiş sorğunun nəticələri göstərir.

Rəyi soruşulanların 46 faizi əmindir ki, genişmiqyaslı toqquşma 2019-cu ildə olacaq. 2017-ci ildə isə belə düşünənlərin sayı cəmi 5 faiz idi. Respondentlərin 50 faizi güman edir ki, ABŞ hərbi münaqişədə iştirak etməyəcək. Qalan 4 faiz hərbçi isə cavab verməkdən çəkinib.

Rəyi soruşulanların əksəriyyəti hesab edir ki, Moskva və Pekin ABŞ üçün əsas təhlükəni təşkil edir. Xüsusi halda, 71 faiz respondent Rusiyanı təhlükəli adlandırır.

Həmçinin nəşr bildirir ki, kiberhücumlar Amerika hərbçiləri üçün əsas təhlükəni təşkil edir.

Rusiyada isə “Levada Mərkəzi”nin keçirdiyi sorğuya əsasən rusiyalıların 50 faizi Suriyada vəziyyətlə əlaqədar Üçüncü Dünya müharibəsinin başlanması təhlükəsini görürlər. Onların fikrincə, Suriyaya vəziyyətlə bağlı Qərb və Rusiyanın indiki münasibətlərin gərginləşməsi dünya müharibəsinə keçə bilər.