Instagram Reels videolarını artıq avtomatik montaj edəcək

Instagram Reels hazırlanmasını asanlaşdırmaq üçün First Draft adlı yeni funksiyanı təqdim edib. Bu funksiya videolardakı səssiz hissələri və lazımsız pauzaları avtomatik müəyyən edərək kəsir və ilkin montajı istifadəçinin əvəzinə hazırlayır. First Draft-dan istifadə etmək üçün Reels Gallery bölməsindən videoları seçmək və “First Draft” düyməsinə toxunmaq kifayətdir. Instagram bundan sonra seçilmiş videoları analiz edir, lazımsız hissələri kəsir və onları montaj üçün zaman xəttinə yerləşdirir. Hazırlanan ilkin versiyaya baxdıqdan sonra istifadəçi videonu Instagram daxilində əlavə olaraq redaktə edə, yaxud birbaşa paylaşa bilər. First Draft Instagram kamerası vasitəsilə yeni video çəkildikdən dərhal sonra da istifadə oluna biləcək. Maraqlıdır ki, Meta yeni funksiyanın təqdimatında süni intellektdən bəhs etmir. Məlumata görə, First Draft süni intellekt əsaslı funksiya kimi deyil, maşın öyrənməsi texnologiyasından istifadə edən alət kimi təsnif edilir. Meta bundan əvvəl, 2025-ci ilin aprelində Edits adlı ayrıca video montaj tətbiqini istifadəyə vermişdi. Şirkət son dövrlərdə Instagram-a müxtəlif süni intellekt funksiyaları da əlavə edir. First Draft isə daha çox gündəlik video montaj prosesini sürətləndirməyə və istifadəçini videodakı boşluqları əl ilə kəsməkdən azad etməyə yönəlib. First Draft ilkin olaraq iOS istifadəçiləri üçün əlçatan olacaq. Meta funksiyanın Android versiyasının nə vaxt istifadəyə veriləcəyini hələ açıqlamayıb.