Fransanın süni intellekt şirkəti Mistral AI 3 milyard avro cəlb edib

Fransanın süni intellekt şirkəti “Mistral AI” 8 sentyabrda D seriyası üzrə 3 milyard avro (təxminən 5,93 milyard manat) investisiya cəlb etdiyini açıqlayıb. Razılaşmadan sonra şirkətin dəyəri 21 milyard avronu keçib. Bu, təxminən 41,5 milyard manata bərabərdir. “Mistral AI” şirkət paylarının satıldığı bu raundu Avropa texnologiya şirkətləri arasında indiyədək ən böyük belə razılaşma adlandırır. İnvestisiya raunduna “Samsung Electronics” rəhbərlik edib. “EQT”nin idarə etdiyi “Scaleup Europe Fund” və əvvəlki investor “PSG Equity” də prosesə birgə rəhbər kimi qatılıb. Mövcud investorlar “a16z”, “Nvidia” və “Salesforce Ventures” yenidən sərmayə yatırıb. “Advent”, “BlackRock” və Lüksemburq Böyük Hersoqluğu isə yeni investorlar sırasına qoşulub. Şirkət yeni vəsaiti server və hesablama gücünü artırmağa, infrastruktur qurmağa, satışları sürətləndirməyə və digər ölkələrdə fəaliyyətini genişləndirməyə sərf edəcək. “Mistral AI” özünü Avropanın “ChatGPT” alternativi deyil, süni intellekt laboratoriyası kimi təqdim edir. Əsas məqsəd hökumətlərə və şirkətlərə məlumatları, eləcə də işlətdikləri süni intellekt modellərini daha çox nəzarətdə saxlamaq imkanı verməkdir. Bu plan çərçivəsində “Mistral AI” 2030-cu ilə qədər Avropada 1 GW hesablama gücü yaratmaq istəyir. Bu, böyük süni intellekt sistemlərinin işləməsi üçün lazım olan server gücüdür. Şirkət avqustda müştərilərə süni intellekt sorğularının hansı regionda emal ediləcəyini seçməyə imkan verən alətlər də təqdim edib. Platformada digər şirkətlərin daxili parametrləri açıq olan süni intellekt modelləri, o cümlədən Çin modelləri də yerləşdirilir. “Mistral AI” hazırda 20 ölkədə fəaliyyət göstərir və əsasən dövlət qurumlarına, eləcə də böyük şirkətlərə xidmət göstərir. ABŞ texnologiyalarından asılılığı azaltmaq istəyən müştərilər şirkətin əsas auditoriyasına çevrilib. Məlumata görə, şirkətin ABŞ mənşəli olmaması gəlirlərinin artmasına kömək edib. Fransa prezidenti bu investisiyanı Fransa və Cənubi Koreyanın süni intellekt sahəsində “3-cü yol” qurmaq məqsədi ilə əlaqələndirib. “Mistral AI” Avropa istiqamətini gücləndirsə də, beynəlxalq tərəfdaşlarla əməkdaşlığı davam etdirir. Niderlandın çip istehsalçısı “ASML” şirkətin əsas tərəfdaş və investorlarından biridir. “Samsung Electronics” də yeni raunddan sonra bu qrupa qoşulub. “Microsoft” ilə strateji əməkdaşlıq isə iyulda genişləndirilib. Beləliklə, yeni investisiya raundunda Avropa, ABŞ və Asiyadan sərmayədarlar iştirak edib.