Apple qatlanan iPhone-u sentyabrda göstərə bilər: qiymət 4250 manatadək

“Apple” ilk qatlanan smartfonu “iPhone Ultra”nı sentyabrın 9-da keçiriləcək tədbirdə təqdim edə bilər. Lakin şirkət cihazın mövcudluğunu və adını hələ rəsmən təsdiqləməyib. Təchizat zəncirindən yayılan məlumata görə, hazırda gündə cəmi bir neçə yüz ədəd istehsal olunur. Satış başlayanda bu say tələbi qarşılamaq üçün kifayət etməyə bilər. İstehsalın yavaş getməsi “Apple”ın sərt keyfiyyət tələbləri ilə əlaqələndirilir. Şirkət kütləvi istehsal olunan cihazların təsdiqlənmiş dizayna uyğunluğunu yoxlamaq üçün avqustda əlavə sınaqlar keçirib. Buna görə kommersiya istehsalı bir neçə həftə gecikib. Sınaqlarda əsas diqqət ekran səthinin düz qalmasına və qatlanan mexanizmin düzgün işləməsinə yönəlib. Planlaşdırılan istehsal həcminə çatmaq üçün normalda gündə 10 minlərlə smartfon hazırlanmalıdır. Buna görə “iPhone Ultra” satışın ilk dövründə məhdud sayda ola bilər. İlkin partiyanın təxminən 10 milyon ədəd olacağı gözlənilir. İstehsalın tam sürətə çatması isə 3 aydan 5 aya qədər vaxt apara bilər. Bu göstərici ayda 5 milyon ədəd istehsal olunan “iPhone 17” ilə müqayisədə 30 faizdən 40 faizə qədər aşağıdır. Digər qiymətləndirməyə əsasən isə ciddi gecikmə yoxdur və satışlar “iPhone 18 Pro” ilə eyni vaxtda və ya ona yaxın tarixdə başlaya bilər. Başqa bir proqnoza görə, təqdimatla satışın başlaması arasında bir neçə aylıq fasilə yarana bilər. Qatlanan smartfonun qiymətinin 2000 dollar (təxminən 3400 manat) ilə 2500 dollar (təxminən 4250 manat) arasında olacağı gözlənilir. Kitab kimi açılan cihaz 5,5 düymlük xarici və 7,8 düymlük daxili ekran ala bilər. Smartfonun qalınlığı açıq vəziyyətdə 4,5-4,8 mm, qatlandıqda isə 9-9,5 mm ola bilər. Ekrandakı qat izinin çox zəif görünəcəyi və ya ümumiyyətlə olmayacağı iddia edilir. İddialara görə, qatlanan model 12 GB operativ yaddaş (RAM) və 5500 mAh tutumlu batareya ilə buraxılacaq. Bu, “Apple” smartfonları üçün indiyədək nəzərdə tutulan ən böyük batareya ola bilər. Cihazda 2 arxa kameranın və həm açıq, həm də qatlanmış vəziyyətdə işləyən ön kameranın olacağı gözlənilir. Korpus nazik olduğuna görə üz tanıma sistemi “Face ID” əvəzinə yan düyməyə yerləşdirilən barmaq izi oxuyucusu “Touch ID” seçilə bilər. Smartfonun “A20 Pro” prosessoru ilə işləyəcəyi ehtimal olunur. Daxili ekranda 2 tətbiqi yanaşı açmaq və məzmunu onların arasında sürükləmək mümkün ola bilər. Lakin “iPadOS”dakı kompüterə bənzər çoxpəncərəli iş rejiminin tam şəkildə təqdim olunmayacağı bildirilir. Qatlanan mexanizmdə maye metal ərintisindən istifadə edilə bilər. Bütün bu məlumatlar hələlik sızmalara əsaslanır. “Apple” cihazın texniki göstəricilərini açıqlamayıb. “Apple” həmin tədbirdə “iPhone 18 Pro”, “AirPods 5”, “Apple Watch Series 12” və “Apple Watch Ultra 4” modellərini də göstərə bilər. Tim Cook şirkətin rəhbərliyini John Ternus adlı yeni baş direktora təhvil verib. Bu, rəhbərlik dəyişikliyindən sonra keçiriləcək ilk böyük təqdimat olacaq. Proqnoza görə, qatlanan “iPhone” 2026-cı ildə satışa çıxsa, dünyada qatlanan smartfon satışları 19 faiz arta bilər. Cihazın bu bazarda təxminən 24 faiz pay qazanacağı gözlənilir. Bununla belə, təqdimat tarixi, satış vaxtı və texniki göstəricilər hələ rəsmən təsdiqlənməyib.