Apple AirPods 5 qulaqlığını təqdim etdi: səsboğma 50% güclənib

“Apple” sentyabrın 9-da “iPhone 18 Pro” təqdimatı zamanı yeni “AirPods 5” simsiz qulaqlığını nümayiş etdirib. 5-ci nəsil modeldə ətrafdakı fon səslərini azaldan aktiv səsboğma sistemi var. Bu sistem “AirPods 4” ilə müqayisədə səsi 50% daha çox azaldır və hər 2 versiyada standart olaraq təqdim olunur. Başlanğıc qiymət əvvəlki nəsildə olduğu kimi 129 dollardır (təxminən 220 manat). “Apple” bunu açıq quruluşlu qulaqlıqlar arasında öz sinfinin ən yaxşı səsboğma sistemi adlandırır. “AirPods 5” modelinin daxili quruluşu yenidən hazırlanıb. Qulaqlığa növbəti nəsil “Adaptive EQ” funksiyası əlavə edilib. Bu sistem səsi qulaqlığın qulaqda necə yerləşməsinə uyğun tənzimləyir. “Personalized Spatial Audio” məkan səsini daha dolğun və canlı çatdırır. Yenilənmiş “Transparency” rejimi ətrafdakı səsləri daha təbii eşitməyə kömək edir. “Adaptive Audio” isə mühitdən asılı olaraq səsboğma və şəffaflıq rejimləri arasında avtomatik tarazlıq yaradır. “Conversation Awareness” funksiyası istifadəçi danışmağa başlayanda musiqinin və ya digər medianın səsini avtomatik azaldır. 149 dollara (təxminən 250 manat) satılan versiyada səs səviyyəsini qulaqlığın ayaq hissəsindən idarə etmək mümkündür. Bunun üçün barmağı yuxarı və ya aşağı sürüşdürmək kifayətdir. Beləliklə, “iPhone” cihazına toxunmadan səsi dəyişmək olur. Bu imkan əvvəllər yalnız “AirPods Pro” modelində vardı. Daha bahalı versiyanın qutusunu simsiz də doldurmaq mümkündür. Apple AirPods 5 qulaqlığını təqdim etdi: səsboğma 50% güclənib H2 çipi “AirPods 5” istifadəçilərinə telefona toxunmadan “Siri” əmrlərindən və “Apple Intelligence” imkanlarından yararlanmağa şərait yaradır. “iOS 27” ilə sınaq versiyasında təqdim ediləcək yenilənmiş “Siri” mesaj, elektron poçt, foto və tətbiqlərdəki şəxsi məlumatları nəzərə alaraq tapşırıqları yerinə yetirə biləcək. Məsələn, elektron poçtda adı çəkilən restoranı tapa və ya mesajda tövsiyə olunan mahnını səsləndirə biləcək. “Live Translation” funksiyası da “Apple Intelligence” ilə uyğun “iPhone” vasitəsilə işləyəcək və danışığı real vaxtda tərcümə edəcək. Batareyanın işləmə müddəti versiyadan asılıdır. Daha bahalı model aktiv səsboğma açıq olduqda 1 dəfə doldurulmaqla 5 saata qədər işləyir, qutu ilə birlikdə isə 22 saata qədər dinləmə imkanı verir. Əsas versiyada qutu ilə ümumi dinləmə müddəti 20 saata qədərdir. Hər 2 “AirPods 5” versiyası üçün ilkin sifarişlər 9 sentyabrda başlayıb. Qulaqlıqlar 18 sentyabrda satışa çıxacaq.