Adobe Premiere montaj proqramına AI ilə video və səs yaratma əlavə edib

“Adobe” peşəkar video montaj proqramı “Premiere”də süni intellektlə video və səs yaratmaq imkanlarını yeniləyib. Yeni “Generative Media” bölməsi birbaşa layihənin zaman xəttindən açılır. Zaman xətti videoların ardıcıllıqla düzüldüyü əsas montaj sahəsidir. Redaktorlar video, səs effektləri, musiqi və fon səsləri yaratmaq üçün brauzerə və ya başqa tətbiqə keçməli olmayacaqlar. Məqsəd montaj prosesini yarıda kəsmədən işi davam etdirməkdir. İstifadəçi video və ya səs yolundakı boş hissəni seçib həmin yer üçün yeni material yarada bilər. Sistem layihənin digər hissələrini nəzərə alaraq nəticəni ümumi məzmuna uyğunlaşdırır. Yaradılan klipləri sonradan tam redaktə etmək mümkündür. Beləliklə, çatışmayan əlavə görüntünü və ya səsi tapmaq üçün ayrıca brauzerə, yaxud başqa tətbiqə keçməyə ehtiyac qalmır. İstifadəçi hansı süni intellekt modelindən yararlanacağını da zaman xəttində seçə bilər. Seçimlər arasında “Adobe Firefly”, “Google Veo”, “Runway”, “Luma” və “Kling” var. İstifadəçi layihənin üslubuna daha uyğun olan modeli müəyyənləşdirə bilər. Bu generatorlar yeni deyil. Əsas dəyişiklik onların birbaşa montaj pəncərəsinə əlavə olunmasıdır. “Premiere” üçün yeni süni intellekt əsaslı səs alətləri də beta sınaq mərhələsindədir. Bu alətlər eyni vaxtda danışan şəxslərin səslərini bir-birindən ayıra bilir. Həmçinin nitq zamanı musiqinin səsini avtomatik azaltmaq mümkündür. Dialoq və ətraf səslər ayrıca tənzimlənə bilər. “Adobe” bununla yanaşı “After Effects” proqramının beta versiyasına “AI Assistant” adlı köməkçi əlavə edir. İstifadəçi sadə dildə əmrlər verərək layihəni yenidən qura, texniki problemləri aradan qaldıra və proqramlaşdırma ifadələri yazmadan effekt yarada bilər.