Onların üç orta barmağı yoxdur, digər ikisi isə içəriyə dönükdür. Mədəni cəhətdən təcrid olunmuş, təbiətlə harmoniyada sadə və sərt həyat sürən Vadoma tayfasının sakinləri özünəməxsus xüsusiyyətləri ilə görənləri heyran edir.

Lent.az-ın xarici mediaya istinadən xəbərinə görə, "Dəvəquşu qəbiləsi"nin üzvləri bu xüsusiyyəti bir üstünlüyə çevirib. Bəs necə?

Afrikada, Zimbabvenin şimal-qərb hissəsindəki Zambezi vadisində Vadoma qəbiləsində yaşayan insanların ayaqlarında cəmi iki barmaq var. Bəs niyə dünyanın ən maraqlı insan icmalarından biri olan Vadoma qəbiləsinin üzvlərinin ayaqları dəvəquşuna bənzəyir?

Onlar dağlarda köçəri həyatı sürürlər, balıq tutmaqla, ovçuluqla, yabanı meyvə və kök toplamaqla dolanırlar. Son illərdə Vadoma tayfası brakonyerliyə qarşı mübarizə çərçivəsində sıxışdırılır. Bu səbəbdən çoxları ovçu-toplayıcı həyat tərzindən əl çəkib düzənliklərə köçməli olublar. Vadomalılar oturaq həyat sürür, yırtıcılardan qorunmaq üçün taxta platformalarda evlər tikir, yağış yağanda sığınacaqlarını həsirlə örtürlər.

Qəbilə Zimbabvedəki yeganə qeyri-kənd təsərrüfatı cəmiyyəti kimi tanınır, lakin onları dünyada məşhur edən qeyri-adi genetik mutasiyasıdır. Vadoma qəbiləsində görülən bu maraqlı vəziyyət tibb aləmində "ektrodaktiliya" kimi tanınır. Ektrodaktiliya əllərdə və ya ayaqlarda bəzi barmaqların olmaması və ya birləşməsi vəziyyəti kimi izah olunur.

Xəstəliyin daha bariz səbəbi 7-ci xromosomdakı mutasiyadır. Bu mutasiya yüksək dərəcədə genetik olaraq miras alınır, yəni valideynlərdən birində bu mutasiya varsa, onların uşaqlarında görünmə ehtimalı 50 faizdir.

Qəbilənin inancına görə, Vadoma mifologiyasında onların əcdadları Baobab ağacından törəyiblər. İcmanın yaşlı üzvləri də əcdadlarının ulduzlardan gələn quşlar olduğunu düşünürlər. Onların danışdıqları hekayə yadplanetlilərin minlərlə il əvvəl Sirius ulduz sistemindən aralarında yaşamağa gəldiyinə inanan Malidəki Doqon xalqının söylədiklərinə bənzəyir.